Sobre o edil socialista Bernardino Rama pesa unha dobre imputación
A imputación de sete concelleiros do PP en Santiago de Compostela tras aprobar que se lle pagase a defensa a outro edil implicado na Operación Pokémon supón que dez dos 13 edís cos que conta o PP na corporación compostelana están imputados nalgunha causa xudicial.
Aos edís agora imputados María Pardo, Amelia González, Juan de la Fuente, Francisco Noya, Cecilia Sierra, Luis García Bello e María Castelao hai que engadir que un total de tres membros do actual equipo de Goberno compostelano están salpicados pola Operación Pokémon, que investiga unha suposta trama de obtención de contratos públicos en diversos concellos a cambio de subornos.
Nesta causa permanecen imputados o propio alcalde de Santiago, Ángel Currás; a edil de Xuventude e Normalización Lingüística, Rebeca Domínguez; e o concelleiro de Deportes, Adrián Varela.
A eles habería que engadir a Albino Vázquez, quen dimitiu como edil de Tráfico e Seguridade Cidadá tras quedar libre baixo fianza de 15.000 euros despois de declarar ante a xuíza Pilar de Lara pola súa implicación na 'Operación Manga', derivada da causa principal.
OUTROS IMPUTADOS NA POKÉMON
Así mesmo, permanece imputado pola xuíza instrutora da Pokémon o concelleiro socialista Bernardino Rama, a quen o xuíz José Antonio Vázquez Taín xa involucrara na causa que investiga o suposto amaño de obras para beneficiar á empresa Montebalsa. O PSdeG conta con nove concelleiros na corporación compostelana.
Na operación derivada da 'Pokémon' tamén foi imputado Gerardo Conde Roa, quen dimitiu en abril de 2012 como alcalde de Santiago acusado dun delito fiscal por non aboar á Axencia Tributaria máis de 291.000 euros correspondentes ao IVE da venda de 61 vivendas, unha causa pola que xa foi condenado.
Tras pasar por prisión preventiva, tamén permanece imputado o que foi asesor de Conde Roa e xefe de gabinete, Ángel Espadas. Así mesmo, na Pokémon tamén están imputados o xefe de gabinete do alcalde compostelano, Francisco Castro Allegue, e dous funcionarios municipais.
OUTRAS CAUSAS
A finais de maio xa fora imputado o concelleiro do PP Juan de la Fuente, no seu caso por un suposto delito de falsidade documental en relación ao caso dunhas facturas supostamente falsificadas para o cobramento de subvencións do Concello por parte de asociacións de veciños.
Outra causa na que fora imputado o actual rexedor de Santiago a raíz dunha denuncia dun axente da policía local foi finalmente sobresida. Esta causa tamén foi arquivada en relación ao exalcalde Gerardo Conde Roa e á exasesora para a coordinación dos corpos de seguridade en Santiago, Mar Hinojosa, pero permanece imputado o exconcelleiro Albino Vázquez por suposta prevaricación.
Desta forma, do grupo municipal do PP en Santiago de Compostela só permanecen sen ningunha imputación o primeiro tenente de alcalde e concelleiro de Emprego e Turismo, Reyes Leis, así como Luís Meijide Rodríguez e José María Rosende Rico, ambos os dous adscritos á Área de Participación Cidadá.
