'Nunha nube'. Así están agora mesmo María Vilas e Laura Calvo, as dúas mozas estudantes galegas de 15 anos que resultaron finalistas do concurso YouTube Space Lab e que agardan coñecer se o seu experimento é o elixido para ser levado á Estación Espacial Internacional (EEI).
'Estamos que non o cremos, moi nerviosas, nunha nube', dixo hoxe María Vilas nunhas declaracións a Efe no colexio público plurilingüe de Rois (A Coruña) onde cursan os seus estudos.
En colaboración coa NASA, a Axencia Espacial Europea e a Axencia de Exploración Aeroespacial do Xapón, o concurso SpaceLab outorgaralles a dous equipos a oportunidade de que o seu experimento se leve a cabo e que YouTube o difunda pola internet desde a EEI.
Animadas polo seu profesor de Tecnoloxía e baixo o epígrafe 'Surfactante en microgravidade. Tecnorois Dous', as mozas gravaron, nun correcto inglés, un vídeo no que propoñen comprobar se a falta de gravidade afecta á interacción de diferentes líquidos cando se mesturan con compostos que diminúen a súa tensión superficial.
Para o seu experimento María e Laura utilizaron dúas placas de metacrilato separadas entre si 2,5 milímetros para mesturar auga, aceite e un surfactante, neste caso lavalouza.
Desde a propia páxina que YouTube Space Lab ten en rede en colaboración co fabricante de tecnoloxía Lenovo, explícase que o traballo das dúas mozas galegas podería contribuír a entender diferentes conceptos, desde a construción de semicondutores dun ordenador á predición do tempo.
'Non tiñamos nin idea do que podería pasar, pero empezamos a indagar e descubrimos que o que fai o surfactante (lavalouza) é debilitar a barreira entre a auga e o aceite de xeito que se coloca un enriba e debaixo a causa da gravidade', explicou María.
'A nosa pregunta é que pasaría se non houbese gravidade, xa que non existiría nin o arriba nin o embaixo, e iso podería dar lugar a fenómenos que aínda non se coñecen', concreta Laura.
O traballo das dúas mozas de Rois foi seleccionado entre máis de dous mil experimentos de oitenta países, o que lles valeu xa cadanseu billete de avión para viaxar a Washington e poder experimentar un voo con gravidade cero ademais de visitar o Museo Aeroespacial Udvar-Hazy, en Dulles (Virxinia).
No Newseum da capital norteamericana tamén asistirán o día 22 de marzo ao acto no que se anunciarán os gañadores, un dos tres equipos da categoría de 14 a 16 anos, á que pertencen María e Laura, e outro de 17 a 18 anos.
Os vencedores mundiais poderán elixir entre unha viaxe a Xapón para ser testemuñas do lanzamento do seu experimento nunha cápsula propulsada por un foguete cara á Estación Espacial Internacional, ou, unha vez acadada a maioría de idade, participar en Rusia nun programa de instrución de astronautas.
