A operadora ferroviaria Renfe aspira a aumentar a súa cota de viaxeiros nas liñas de alta velocidade Ourense-A Coruña e Ourense-Compostela coa entrada en servizo a partir do 10 de decembro do tren Avant, que circulará ata 250 quilómetros por hora e rebaixará á metade o tempo de traxecto.
Así o indicaron os responsables da Renfe na presentación do novo tren e das tarifas que pretenden atraer viaxeiros que ata agora se desprazaban por estrada.
O novo trazado ferroviario permitirá reducir á metade o tempo de traxecto de Ourense-A Coruña, que será de 1 hora e 8 minutos, fronte a 2 horas e 15 minutos actualmente.
Así mesmo, a viaxe na liña Santiago de Compostela-Ourense levarase a cabo en 38 minutos, fronte a 1 hora e 34 minutos no antigo trazado.
Renfe indicou que o novo trazado de alta velocidade permitirá tamén reducir o tempo de viaxe dos trens Talgo que enlazan Galicia con Madrid.
Responsables da Renfe indicaron que o encarecemento do prezo deses traxectos será compensado con outros servizos que ofrecen os novos trens, que máis alá da rapidez, ofrecerán confort e servizos a bordo.
Os trens Avant irán equipados con 'conexión eléctrica en cada asento', máquinas expendedoras de bebidas e aperitivos, sinalou o director xeral de viaxeiros da Renfe, Enrique Urkijo, que participou nunha viaxe inaugural.
Segundo Urkijo, o encarecemento do billete non suporá cambios moi significativos para os usuarios e subliñou que o seu prezo será 'absolutamente competitivo'.
Apuntou que o bono de 50 traxectos para os viaxeiros regulares, pasará de 4,90 euros a 5,76 euros por desprazamento, pero apuntou que 'o custo da autoestrada supón máis de cinco euros', sen ter en conta que chegará máis rápido.
Con esta nova conexión, Renfe espera captar numerosos viaxeiros que ata agora se desprazaban en automóbil ou autobuses entre esas localidades galegas.
Así, a operadora pretende atraer 400.000 viaxeiros no corredor Ourense-A Coruña e aumentar notablemente a súa cota de viaxeiros.
'A nosa aspiración é pasar da cota de mercado que tiñamos do 8% entre Ourense e Santiago a un 40%', e do 13 ao 20% na conexión Ourense-A Coruña, indicou Urkijo.
Apuntou que Galicia conta con 1,5 millóns de viaxeiros internos que ata agora se desprazaban no 90% dos casos en vehículos particulares.
A compañía Renfe devolveralles aos viaxeiros o 50% do prezo do billete se o tren sae con máis de 15 minutos de atraso e o 100% no caso de que a demora sexa de máis de 30 minutos, nun compromiso 'de puntualidade', indicou Urkijo.
Inicialmente, o corredor Ourense-Santiago manterá os tres servizos que existen na actualidade pola vía convencional aos que se van sumar agora outros cinco servizos en cada sentido e entre Compostela-A Coruña 'séguense mantendo os 17 servizos por sentido que existían' aos que se suman dous traxectos en Avant.
Preguntado pola futura infraestrutura do Eixe Atlántico, declarou que é unha 'obra absolutamente necesaria e que vai ter moita aceptación', e que 'vai seguir un modelo similar ao utilizado ao norte de Galicia'.
Renfe ofrecerá diversas fórmulas tales como bonos de 10,20 e 50 viaxes con descontos e prezos reducidos para aqueles que viaxen con frecuencia.
