O presidente da Xunta, Alberto Núñez Feijóo, avanzou hoxe a aprobación do chamado programa Galicia 1.000, un paquete financeiro dotado con 50 millóns de euros que tratará de apoiar un milleiro de novos proxectos a través dun conxunto de medidas que prevén mobilizar en total 200 millóns.
Acompañado do conselleiro de Economía e Industria, Francisco Conde, o presidente considerou que se trata dun importante programa para facilitar a recapitalización das empresas e a execución de novos investimentos.
Conde explicou que o destino de 50 millóns se fará a través de catro instrumentos financeiros: fondos de capital risco, préstamos ou bonificacións de tipos de xuro e avais.
O conselleiro, que cualificou de "realista" esta actuación, destacou que o primeiro grupo de actuacións suma 32,5 millóns, cos que se financiarán operacións que permitirán reforzar o capital.
Mentres, destínanse outros 8 aos chamados préstamos Jeremi, unha iniciativa que permite outorgalos a empresas con fondos europeos e un terceiro grupo de actuacións suma dous millóns para bonificar os intereses dos créditos.
Por último, referiuse á cuarta ferramenta, que disporá de 7,5 millóns para avalar operacións de acceso ao circulante.
Para concluír, o presidente da Xunta manifestou que desde o comezo da crise, en 2009, ata 2014 concedéronse máis avais e préstamos que os que outorgou o Goberno galego desde que existe.
