Esta mañá, a Biblioteca de Verín clausuraba o seu ciclo de videoconferencias temáticas coa presentación do libro "Memorias do silencio" de Eva Mejuto, na que participaron 80 menores do IES Castro de Baronceli e do CPR María Inmaculada.
"Memorias do silencio" é unha novela a tres voces que explora, entre ficción e realidade, un capítulo pouco coñecido do noso pasado recente: Galicia durante a II Guerra Mundial. Eva Mejuto regresa á narrativa xuvenil con esta obra, finalista do Premio Jules Verne, logo da súa incursión con "22 segundo" -Xerais, 2017-.
Ciclo de conferencias
Esta videoconferencia puña o broche final a este novo formato online organizado pola Biblioteca Pública Municipal de Verín, que vía a luz este ano froito da actual situación sanitaria provocada polo coronavirus.
Esta actividade estivo formada por un total de 7 conferencias temáticas variadas -con 8 relatores- que foron visualizadas por máis dun milleiro de persoas na canle oficial de Youtube da Biblioteca.
Segundo destacou Emilia Somoza, concelleira de Educación, Cultura e Festexos do Concello de Verín, "estamos moi contentos co resultado desta iniciativa, tanto pola gran acollida obtida por parte dos centros educativos e o seu alumnado como polo aumento de subscritores logrado na canle de Youtube da Biblioteca, que se duplicou nestes meses acadando preto das 50.000 visitas".
Pola súa banda, dende a Biblioteca quixeron "agradecer a súa colaboración aos centros de ensino, profesores e profesoras, ao alumnado, aos seguidores que temos en Youtube, novos e antigos, e a concelleira de Cultura Emilia Somoza, porque estivo presente en todas as conferencias que lle foi posible por axenda".