A Biblioteca de Verín adapta a súa programación á actual situación sanitaria

A Biblioteca Pública Municipal do Concello de Verín adapta a súa programación a actual situación sanitaria organizando un total de sete videoconferencias de temáticas variadas, entre os meses de febreiro e xuño do ano 2021. Tamén poñerán a disposición dos centros escolares da vila visitas virtuais polas súas instalacións.

Estas conferencias online impartiranse en horario matinal e terán unha duración de 30 minutos aproximadamente, sendo os alumnos e alumnas dos centros escolares o seu principal público. Posteriormente, as charlas estarán á disposición de calquera persoa que desexe coñecer os encontros a través da canle oficial de youtube da Biblioteca.

Emilia Somoza, concelleira de Educación, Festexos e Cultura, declara que "ante a suspensión de todos os actos presenciais previstos como consecuencia da pandemia do Covid-19, seguimos buscando fórmulas alternativas para manter a actividade cultural na nosa vila", ao que engade que dende o Concello e a Biblioteca entenden que nestes "difíciles momentos, nos que todos estamos obrigados a permanecer tantas horas nos nosos fogares", se precisa buscar proxectos que empreguen as plataformas dixitais e que cheguen á cidadanía dunha maneira totalmente segura.

Ademáis das conferencias temáticas, os responsables da Biblioteca Municipal tamén ofrecerán aos centros escolares verineses a posibilidade de realizar unha visita guiada polas súas instalacións, explicando os fondos cos que contan así coma os distintos traballos e o valor que teñen estas entidades.

Videoconferencias temáticas

As citas programadas pola Biblioteca de Verín.

Dende febreiro ata xuño, desenvolveranse 7 videoconferencias temáticas programadas do seguinte xeito:

• O 9 de febreiro, Miguel Losada -escritor e secretario da Sociedade Antropolóxica Galega- falará sobre "Cigarróns do oeste: Traxes, zamarras e pistolas".
• O 3 de marzo é o turno de Toti Martínez, unha escritora que analizará a evolución do Camiño de Santiago, antes da súa maior difusión pola relixión cristiá.
• O 7 de abril serán Víctor Freixanes, presidente da Real Academia Galega, e Montse Pena, profesora, biógrafa de Xela Arias e crítica literaria, os encargados de achegar a figura de Xela Arias, conmemorando as Letras Galegas 2021.
• O 30 de Abril, Francisco Narla -escritor- presentará a súa última novela: "Fierro".
• O 7 de maio, Domingo Villar -escritor e xornalista- achegará o coloquio "De ollos de auga ata o último barco: A serie de Leo Caldas".
• O 21 de maio, a escritora e avogada, Ledicia Costas presentará o seu libro "Infamia".
• O 3 de xuño, rematará esta rolda de conferencias Eva Mejuto -escritora- coa presentación do seu libro "Memorias do silencio", finalista dos Premios da Crítica de Galicia.