O Inorde e o Colexio de Enxeñeiros Agrícolas de Ourense exploran posibles liñas de colaboración entre ambas entidades para desenvolver proxectos no ámbito do sector primario.
Así o analizaron Rosendo Fernández e Emma González, presidente e xerente do Inorde, con Manuel Rojo, José Paz e Miguel Ángel Viso, presidente, vicepresidente e secretario do Colexio respectivamente, durante a visita ás instalacións e á finca de ensaio do Centro de Desenvolvemento Agrogandeiro do Inorde. Durante a mesma, o presidente do Inorde destacou a importancia da cooperación entre os distintos axentes implicados no sector primario "para establecer sinerxías que favorezan o correcto desenvolvemento do mesmo".
A visita comezou na finca de ensaios que o Inorde destina ao cultivo da vide en Monterrei, acompañados por José Luis Suárez, alcalde do municipio, e Natalia González, da DO Monterrei.
A seguinte parada foi ao Centro de Desenvolvemento Agrogandeiro en Xinzo de Limia, onde se amosaron as actividades que alí se desenvolven, centradas no asesoramento agrícola en apoio aos agricultores ourensáns.
A xornada rematou cunha visita á finca de ensaios Antela, na que o Inorde desenvolve experiencias de campo en relación con cultivos como cereal e pataca e que na presente campaña soporta a maioría da parte experimental do proxecto Soil Diver Agro.
