O alumnado do "Obradoiro de Froiticulutra Mocidade de Verín" da Mancomunidade de Municipios de Monterrei visitaron hoxe as instalacións do Centro de Desenvolvemento Agrogandeiro do Inorde.
O motivo da visita é que os alumnos, acompañados do seu monitor, coñezan os procesos básicos da sistemática de análise de solos, ademais das accións e servizos que o Instituto Ourensán de Desenvolvemento Económico realiza no ámbito do sector primario provincial.
Na actividade tratouse a importancia que ten coñecer as necesidades dos cultivos, o respecto e os coidados que o agricultor lle debe dispensar ó solo de cultivo e a determinación e o control de pragas e enfermidades.
Tamén se lle explicou aos mozos e mozas do obradoiro de emprego a problemática dos agricultores de nova incorporación, a transición ecolóxica e a necesaria vinculación entre agricultura e medio natural.
Dende o Inorde consideran que a formación dos novos profesionais é unha liña de traballo esencial e, por iso, este tipo de iniciativas supoñen unha parte fundamental dos servizos que este organismo presta en apoio ao sector primario da nosa provincia.
