O Concello de Oímbra, como cada ano, vén de abrir o prazo de solicitude de axudas para a adquisición de libros e material escolar para o curso 2022-2023 para alumnos de Educación Infantil, Primaria e Educación Secundaria.
Os interesados en solicitar esta axuda, con cargo aos orzamentos municipais, deberán facelo antes do 28 de outubro e teñen que estar empadroados no municipio. “É unha maneira de alixeirar os gastos cando comeza o curso escolar para as familias”, explica Ana Villarino, alcaldesa de Oímbra.
Esta axuda, compatible cos apoios doutras administracións, enmarcase dentro do Plan municipal de axudas do Concello de Oímbra, un programa que ofrece subvencións aos autónomos, á contratación de persoal das empresas de Oímbra, ás festas patroais, ás entidades deportivas e á vivenda, así como aos estudantes.
Almorzos saudables
Dende o Concello, e co apoio da Deputación de Ourense, tamén lanzaron outro ano máis o seu programa “Almorzos saudables” no CEIP de Oímbra, para facilitar a conciliación da vida laboral e familiar. Este servizo está dispoñible dende ás 08,00 horas ata a entrada ás aulas.