O grupo local de teatro La Caja de Pandora non faltou ao seu tradicional evento anual: o Festival de Teatro Entreculturas, que este ano chega a súa XIII edición. A cita comezou onte e encherá o Auditorio de Verín de humor, reflexión, bo ambiente e, por encima de todo, teatro.
O grupo de teatro de nais e pais da Universidade Laboral foi o encargado de dar o pistoletazo de saída ao Entreculturas, coa súa obra “O soño dos vagalumes”, con gran expectación.
Hoxe, ás 20,30 horas será a quenda da representación “Os vellos non deben de namorarse” da man da agrupación teatral Silvardeiras de Allariz. Será La Caja de Pandora o grupo encargado de poñer o broche final o sábado a este festival que organizan con tanto mimo, coa súa obra “Tiza”.
