Uxía: “Tíveno difícil, pero aprendín como empoderarme”

A galega Uxía e o andaluz Javier Ruibal uniron as súas forzas e talentos para crear “De tu casa a la mía”, un traballo que presentarán este xoves 4 de agosto no ourensán Castelo de Monterrei, no marco do ciclo de concertos “Xacobeo no Interior”. Ambos artistas proveñen da música popular ibérica que se proxecta ao mundo; son dúas voces que beben de todo ese acervo que Lorca e Rosalía trasladaron aos seus versos, que son pura musicalidade e inspiración. No caso de Uxía, claro, xoga de local. Co alcume de “a voz do Atlántico” por conectar a música tradicional galega con ritmos de Cabo Verde, Brasil ou Portugal, leva publicados unha ducia de discos nas súas tres décadas de carreira e é considerada por propios e estranos unha pioneira do folk galaico. Modestia mediante: “Eu tamén lle debo moito ás pioneiras que sacharon antes cá min, e tamén ás voces anónimas de muller que nos legaron este rico patrimonio”. Acabas de editar con Javier Ruibal “De tu casa a la mía”, será este o repertorio central no concerto en Ourense? Haberá outras cancións? O repertorio é do disco, para mostrar o seu potencial ao vivo, mais haberá un fin de festa cheiño de agasallos e de clásicos do noso repertorio. ¿Como se xestou “De tu casa a la mía”? Queríamos facer algo xuntos despois de varias experiencias e colaboracións, e pensamos ir na mellor compañía. Os dous bebemos da música popular ao igual que Lorca e Rosalía, pareceunos oportuno facer esa ponte Norte/Sur para estreitar lazos, poñer a dialogar a estas dúas figuras emblemáticas da nosa poesía. Logo chamamos a Tannus, Teira e Javi Ruibal, e fomos armando o repertorio composto entre os dous para gravalo nun lugar mítico, un templo da música estival: o Náutico de San Vicente. E por agora sentimos que isto terá continuidade, que nos produce alegría, emoción e moito pracer. Sempre fuches unha muller con gran protagonismo na escena musical galega. É moi significativo o nome do espectáculo que protagonizaches con Amalia Rodrigues e María del Mar Bonet a principio dos anos 90, “Mujeres a viva voz”. Teno máis fácil hoxe a muller na música? Atopáchesche con moitos obstáculos polo feito de ser muller? Eu tamén lle debo moito ás pioneiras que sacharon antes cá min e tamén ás voces anónimas de muller que nos legaron este rico patrimonio. Tíveno difícil, máis non renunciaría a este oficio por nada do mundo. Aprendín a empoderarme, a sentir que o que facía era crear en liberdade e en constante experimentación, fusión e mestizaxe sempre partindo da música de raíz. Tamén aprendo moito das máis novas. Alégranme os seus éxitos e sempre que podo, apoio e impulso como boa madriña que creo ser. DÓNDE: CASTILLO DE MONTERREI CUÁNDO: XOVES 4 DE AGOSTO, AS 20,00 HORAS CUÁNTO: GRATUITO