Eva Pérez, alcaldesa de Vilardevós, e Emilio González, subdelegado do Goberno en Ourense, reuníronse este mércores no Concello de Vilardevós para supervisar os investimentos estatais neste municipio e coñecer as súas demandas e opinións. Ademais, o subdelegado aproveitou para dar a benvida á alcaldesa no seu novo cargo, tras desbancar ao Partido Popular e pactar un goberno bipartito con Interior Galego Vivo.
Emilio González puxo Vilardevós como exemplo da aposta do Goberno central polos pequenos concellos, "que están chamados a ser protagonistas da transformación de España cara un país verde, dixital, sostible e cohesionado, para acadar os obxectivos do reto demográfico".
Nesta liña, o subdelegado puxo sobre a mesa a axuda concedida polo Ministerio para a Transición Ecolóxica e o Reto Demográfico, que se eleva a máis de 40 mil euros e con ela o Goberno local afrontou a mellora enerxética do alumeado público. A actuación, que se atopa neste momento na segunda fase, consiste na substitución de luminarias de tipo tradicional por luces Led de maior rendemento e eficiencia.
Cobertura de internet e alta velocidade
Emilio González tamén avanzou o impacto dos investimentos en dixitalización que está a executar o Goberno, a través do Ministerio de Asuntos Económicos e Transformación Dixital, o que tamén chega a Vilardevós. É unha demanda de moitos veciños de núcleos poboacionais do concello, que nos últimos tempos viron como a conexión á rede fallaba.
"O programa Unico-Banda Ancha facilitará a conexión de banda ancha con velocidade ultrarrápida a 43 núcleos de poboación, que cubrirán un total de 108 unidades inmobiliarias, das cales 92 son vivendas, o que na práctica, supón a completa dixitalización do territorio municipal dotándoo de acceso con velocidades de 300 megas", detallou González na súa visita a Vilardevós.
