O grupo municipal Espazo Común no Concello do Carballiño rexistrou tres escritos para solicitar información concreta e precisa sobre o anuncio feito polo alcalde, Francisco Fumega, da súa intención de encargarlle a unha empresa o servizo de recollida de lixo.
Concretamente demandan no primeiro escrito unha copia do estudo económico no que se basean as declaracións públicas nas que se fala de 900.000 euros e xa un número moi concreto de operarios e maquinaria.
Nun segundo escrito, pregunta Espazo Común se foi o departamento de Intervención quen elaborou dito estudo ou de non ser así, é dicir, se o fixo algunha empresa externa, que se emita canto antes unha valoración por parte dos servizos económicos municipais ao respecto. Por último, solicita datos sobre os pregos necesarios para este concurso e pregunta quen se encargou ou se encarga da súa confección e pide que se emita canto antes o preceptivo informe antes de poñer en marcha ningún procedemento.
