O Concello do Carballiño nos últimos anos organiza un espectáculo polo Día de Reis dirixido ó público familiar que atrae a moita xente da comunidade autónoma, convertíndose nun referente que ademais cada edición conta con novas sorpresas, segundo valora o concelleiro de Cultura, Diego Fernández.
O punto de encontro será a fachada do Templo da Veracruz, que nesta ocasión recibirá ós visitantes ás 17,30 horas cun espectáculo, onde unha artista executará un trepidante e elegante número de malabares suspendida a mais de 15 metros de altura, coordinado entre luces, son e figuras flotantes, dando paso a malabares con lume, para rematar cun espectáculo de pirotecnia. As súas Maxestades de Oriente saudarán dende a torre da Veracruz, para logo desfilar polas rúas, acompañados dun séquito de figuras de fantasía tales como cabalos de luz e cor, zancudos, xigantes ou mesmo patinadoras máxicas.
O tramo afectado da rúa Evaristo Vaamonde deberá estar libre de vehículos aparcados dende as 8,00 horas do venres e permanecerá cortado ao tráfico dende as 12,00 horas. Ademais, as rúas polas que circulará a cabalgata serán Conde Vallellano, Rosalía de Castro, Tomás María Mosquera, Cruce de Ribadavia, Rúa Ribeiro e Cesáreo Tizón. Ao remate da cabalgata, os reis pronunciarán o seu mensaxe de Nadal e, posteriormente, recibirán ós cativos no salón de plenos .
A Concellería de Cultura agradece a colaboración de Protección Civil e Cruz Vermella, Policía Local, Grupo Municipal de Emerxencias, brigadas de obras e medioambiente, servizo eléctrico e Garda Civil; e destaca a importancia de facer as compras no comercio local.
