Dado o éxito acadado no 2021 e no 2022, a Fundación Insua dos Poetas celebrou de novo este ano a tradicional Festa do Magosto destinada ós máis pequenos. Nesta edición, a fundación contou para a organización coa colaboración dos concellos do Carballiño e do Irixo. Un total de 600 persoas, con nenos e adolescentes, desfrutaron gratis de varias atraccións destinadas a incentivar a creatividade. Trátase de xogar, divertíndose con actividades que axuden a promover, didacticamente, a cultura e a lingua propias.
“Sabido é que os magostos, na provincia de Ourense, van máis alá do día de San Martiño”, aclara Luís González Tosar, presidente da Insua dos Poetas. “Hai todo un tempo de magosto no que os nenos deben participar manifestando as súas iniciativas”, engade. “O magosto non é un botellón, os nenos perderon nestes últimos anos o protagonismo nesta festa, que na actualidade limítase prácticamente a comer os produtos típicos, participando maioritariamente os adultos. A fundación devólvelle o antigo protagonismo aos nenos e mozos, organizando o único magosto dedicado a eles de toda Galicia, conservando a súa esencia”, conclúe.
O Magosto infantil e xuvenil brindou posibilidades para a lectura e para descibrir interesantes aspectos da cultura tradicional. De aí o sorteo de lotes de libros e de xogos didácticos.
