O Grupo Socialista impulsa no Parlamento de Galicia unha iniciativa para que se cubran as dúas prazas de Pediatría do centro de saúde do Carballiño. Os socialistas critican a “falla de previsión” do Goberno galego á hora de cubrir as prazas que quedaron vacantes por unha xubilación e un traslado xeográfico e amosan o seu total respaldo e apoio á veciñanza do Carballiño que está a demandar uns servizos dignos e xustos para as súas crianzas. A iniciativa saíu adiante por unanimidade.
A deputada do PSdeG-PSOE de Ourense no Parlamento de Galicia, Marina Ortega Otero, defendeu este xoves na comisión de Sanidade, Política Social e Emprego unha proposición non de lei na que instan á Xunta a que, a través da Consellería de Sanidade, cubra as dúas prazas de pediatría do centro de saúde do Carballiño. A parlamentaria socialista alertou de que a falla do servizo de Pediatría durante as tardes e a ausencia deste especialista no servizo de Urxencias “obriga aos pais dun centro que atende a 27.000 persoas de 9 concellos e a case 2.500 crianzas a desprazarse ao servizo de Urxencias do Hospital de Ourense, moitas veces colapsado, ou directamente optar pola sanidade privada”.
Marina Ortega aproveitou tamén a súa intervención para sinalar que “é preciso que o goberno galego acolla estas demandas que trasladan os veciños para blindar os servizos de matrona, Xinecoloxía e Pediatría”.
