As obras terán un custe de 247.000 euros e a empresa encargarase dos coidados durante un prazo de 12 anos
As obras para a instalación de céspede artificial no campo de fútbol de Melias (Pereiro de Aguiar) están máis preto de comezar, unha vez que xa se abriron as distintas propostas económicas das diferentes empresas, e resultou elixida para a adxudicación pola mesa de contratación a empresa Zona de Obra O Rosal, que fixo unha oferta 55.000 euros por debaixo do prezo de licitación.
A oferta económica da empresa elixida foi de 247.000 euros, cando o prezo máximo da adxudicación situárase nos 302.000 euros ao inicio. Ademais, a empresa ofreceu un compromiso de mantemento do céspede por un periodo de 12 anos de duración.
A renovación desta infraestrutura deportiva parte do acordo entre a Deputación de Ourense e a Xunta de Galicia, a través dun convenio coa Secretaría Xeral para o Deporte–e do Concello de Pereiro de Aguiar.
MANTEMENTO
Dentro do mantemento de 12 anos, inclúese, cada seis meses, unha revisión do rego e a drenaxe, unha limpeza da superficie do campo para deixalo libre de residuos e follas, un cepillado das fibras do céspede, a revisión dos puntos de penalti, as liñas de xogo, os equipamentos deportivos e as canaletas, e a limpeza de herbas e musgos.
