O conselleiro de Presidencia, Alfonso Rueda, salientou hoxe en Ourense que o plan Impulsa Ourense xa conta con once solicitudes valoradas de forma positiva polo Instituto galego de promoción (Igape), das cales dúas foron aprobadas, o que supón 'tantas como nos doce meses anteriores'.
O director do Igape, Joaquín Varela, precisou que a aprobación dos dous proxectos, un un hotel en Ourense e o outro un balneario no Carballiño, ademais dos seis en fase de estudo, son 'noticias positivas' para Ourense nunha contorna que cualificou de 'complicada'.
O conselleiro indicou antes da reunión de seguimento do plan Impulsa, xunto ao delegado territorial da Xunta, Rogelio Martínez, e o director do Igape, Joaquín Varela, que se trata dun bo balance', sumado á adxudicación do plan estratéxico.
Segundo dixo, desde que se puxo en marcha o plan Impulsa en outubro do ano pasado 'foron presentadas ao redor de 500 solicitudes', das cales once 'podémolas cualificar de grandes investimentos'.
Coa aprobación destes dous proxectos, o conselleiro anunciou a creación de 'ao redor de cincuenta novos empregos' ademais da consolidación de 170 'que poderían estar en perigo'.
Ademais das dúas solicitudes aprobadas polo Igape, para as empresas Cauner Patrimonial e Garriga e Hijos, que contarán con 2,5 millóns de euros de investimento e unha subvención de 500.000 euros a través do plan Impulsa, o conselleiro indicou que hai outras seis 'que xa están valoradas' e que 'cumpren os requisitos'.
Así as cousas, Rueda asegurou que 'non se estivo perdendo o tempo' e que a 'mellor demostración' diso son as 500 solicitudes presentadas.