O BNG censurou o uso “indecente” dos recursos e da imaxe corporativa do Concello. A formación nacionalista advirte que a lona instalada na avenida das Caldas na que se anuncia a construción do Parque Coto de Canedo “é mentira e pura propaganda pois a día de hoxe non hai crédito para a súa execución e o movemento de terras da zona correspóndese cunha obra duns particulares, o que o alcalde aproveita para enganar á xente”.
En canto á cartelería en Marcelo Macías, na que se usa o logo do Concello para responsabilizar á Xunta do mal estado, desde o BNG sinalan que “hai que ter moi pouca vergonza, xa que o Concello recepcionou esa obra coñecendo informes dos técnicos que denunciaban as múltiples deficiencias, algo que, por certo, levamos ao Parlamento”. Luis Seara lembra que “existe unha corresponsabilidade entre a Xunta e o Concello, uns pola mala execución da obra e os outros por recepcionala pese a ter informes técnicos en contra”.
