Unha ruta por Ourense chea de curiosidades polo Día do Guía de Turismo

O Paseo era a zona de namorar dos aristócratas. Por iso están alí unhas árbores chamadas, poliamores”. Ista foi unha das curiosidades que se puideron escoitar durante a visita organizada pola Asociación Profesional de Guías de Turismo de Galicia durante a mañá de onte. O acto solidario celebrouse con motivo do día Internacional do Guía Turístico e foi aproveitada para amosar a Ruta Aurea do casco histórico da cidade. A citación comezou ás 11,30 no Xardín do Padre Feijoo e alí esperaban tanto visitantes locais como estudantes do CIFP A Farixa para descubrir o que ían dicir os organizadores da visita. O delegado provincial da Asociación, Pepe Mosquera, iniciou o percorrido cunhas pequenas palabras para recordar a finalidade deste día: “O obxectivo é dar a coñecer e celebrar a nosa profesión a nivel Galicia. O que facemos non é un hobby e, coa problemática dos intrusismos, sentimos que hai que destacar esta labor e por iso fixemos esta ruta solidaria. Este ano, os cartos que nos ofrezan na ruta, irán para Feaces (Federación de Asociacións de Familiares e Persoas con Enfermermidades mentais de Galicia)”, indicou. A condutora da ruta, nesta ocasión, foi Gema Seara. Para ela, foi “un día de celebración” e aproveitou para ter un discurso amenizado con preguntas ou anécdotas curiosas das zonas visitadas. Roteiro de sabeduría Os organizadores desta cita descubriron as entrañas da cidade dende case os seus comezos. O inicio foi no Xardín do Padre Feijoo para destacar o gran crecemento da cidade ao longo dos anos: “Pensade que inicialmente a cidade crece a un quilómetro de distancia do río Miño. O río orixinario de Ourense é o río Barbaña”, explica Seara antes de guialos a través da Praza do Bispo Cesáreo para detallar sobre a evolución arquitectónica dos edificios e, logo, á zona das Burgas. Alí, a guía comezou dicindo que “as Burgas, antes de entendelas coa cabeza, hai que sentilas”; continuou explicando que Ourense é a “segunda cidade de augas termais de Europa” e rematou expresando o valor arqueolóxico que teñen os restos do Centro de Interpretación das Burgas. Logo guiouse aos curiosos pola Praza Maior para saber, entre outras cousas, o motivo da súa inclinación e seguiron coas diversas modificacións que houbo nas fachadas da Catedral. Precisamente, foi no lado oeste e, en concreto, na Praza do Paraíso onde se deu por rematada a sesión. Futuros guías O CIFP A Farixa é o único centro de estudos da provincia onde se imparten os ciclos superiores de guías e información turística e axencias. Para as profesoras, Ana Otero e Rita Masid, a súa visita quería “incidir na importancia de apoiar aos antigos alumnos e tamén á profesión”.