O PSOE ourensán aopiou un cambio nas políticas sociais durante unha visita á asociación de persoas xordas
A deputada do PSdeG-PSOE por Ourense, Marga Martín, e a número un da lista socialista pola provincia ao Parlamento de Galicia, Carmen Rodríguez Dacosta, asistiron a un encontro con representantes da Asociación de Persoas Xordas da cidade. Esta actividade está inmersa dentro da ronda de contactos que este partido está a facer con diferentes colectivos e asociacións.
Unha nota do partido pon esta visita no contexto da aprobación o día 18 de xaneiro, no Congreso dos Deputados, da modificación do artigo 49 da Constitución para mudar o termo “disminuidos” polo de “persoas con discapacidade”. Martín amosouse satisfeita coa reforma lexislativa que “restitúe, en certo modo, a dignidade de todas as persoas con algunha discapacidade e diversidade” pero tamén consciente de que “queda moito traballo por facer no que a políticas sociais se refire”. A parlamentaria alude a que coa visita “quixemos ofrecerlle o noso apoio e total dispoñibilidade aos e ás usuarias desta entidade que en 2024 celebra o seu 50 aniversario e que leva tantos anos loitando pola integración”.
Por parte da entidade, estiveron na reunión o presidente da mesma, Martín Luis Becerra; a secretaria xeral, Sara Janeiro Vázquez; e a intérprete da asociación que explicaron as barreiras coas que se atopan no día a día e que, na maioría dos casos, “teñen solucións sinxelas se hai vontade política”.
Carmen Dacosta, candidata ao Parlamento de Galicia incidiu en que na actualidade aínda son moitas as eivas coas que se atopan as persoas xordas, sobre todo no eido sanitario, cultural e educativo. Dixo que os socialistas de Galicia, con José Ramón Gómez Besteiro como aspirante a presidente da Xunta, “impulsaremos as políticas de integración das persoas con discapacidade porque realmente é necesario e teñen os mesmos dereitos que todas e todos”.
