Estudan previr o cancro colorrectal usando a IA en Ourense

A Escola Superior de Enxeñaría Informática do Campus de Ourense acolleu onte a primeira xuntanza de traballo da rede estatal AI4PolypNet, creada para mellorar os sistemas de detección e diagnose de cancro colorrectal mediante o emprego de intelixencia artificial.

Deste xeito, a cidade inaugurou os encontros de traballo desta unión de oito grupos de investigación procedentes de diversas comunidades autónomas: Cataluña, Estremadura, Galicia e o País Vasco. A idea é sumar esforzos: “Optimizar experiencia, recursos técnicos, humanos e de datos e avanzar cara o desenvolvemento de propostas integradoras capaces de responder aos retos desta enfermidade”, tal e como trasladan fontes universitarias. Na rede participa, por exemplo, o Grupo de Oncoloxía Dixestiva de Ourense, pertencente ao Sergas.

Dende a rede explican que este cancro é “un dos de maior incidencia mundial”. Cada ano diagnostícanse case dous millóns de casos, cunha mortalidade de 916.000 pacientes en 2020. Máis do 90% dos casos teñen cura “se a súa lesión precursora, o pólipo precanceríxeno, se detecta e extrae a tempo”, segundo engaden os investigadores.