Francisco Javier Rajo: "A especialización do Campus de Ourense vai ser unha realidade antes do nadal"

Francisco Javier Rajo pasou de estudar no Campus de Ourense a ser agora o seu máximo responsable. O pasado luns recibiunos no seu despacho, onde estaba traballando en proxectos para seguir desenvolvemento todo o potencial da universidade en Ourense; un potencial do que é bo coñecedor tanto como alumno, como docente, como investigador e agora como directivo. Acaba de rematar a primeira semana do curso. Que balance fai destes primeiros días? O curso empezou moi ben. Tivemos unhas xornadas de acollida a semana pasada que foi un éxito rotundo. Logramos encher o pavillón universitario de estudantado que van desenvolverse no Campus. Isto é relevante porque aquí estuda moita xente de fóra da provincia, algo que tamén repercute na economía da propia cidade. O obxectivo é que coñezan o Campus, pero tamén a cidade. Vaise seguir apostando por esa integración da universidade no día a día da urbe? Si. Xa hai moitos anos que se quitaron aqueles valos do Campus para que se integre na cidade, e cada vez queremos achegarnos máis a ela. Tamén está enfocada a xornada en que saiban que existen moitos servizos á súa disposición. O que buscamos é que non só pasen pola universidade, se non que a universidade pase por eles. Este ano estréase o mestrado de Aeronáutica. Que tal comezou? Moi ben, cun grande éxito de matrícula. É moi importante contar con este mestrado porque permite, por unha banda, aos alumnos continuar a súa formación en Ourense, e, pola outra, reter talento. Está claro que se a xente marcha fóra facer o mestrado, despois é moito máis difícil que retornen aquí. E que traballen aquí. Que importancia ten a relación entre o Campus e as empresas? Vital. Temos un programa moi grande de colaboración con empresas e todos os alumnos que queiran poden ter a oportunidade de facer as súas prácticas na empresa que elixan. É máis, se unha compañía non ten un acordo con nós e alguén quere ir facemos un convenio novo para colocar aos nosos alumnos na empresa que eles desexen. Mencionaba anteriormente o éxito na matrícula. Se ben é certo que aínda quedan convocatorias, hai sete titulacións que aínda teñen vacantes. Como está a situación destas carreiras? Cales son as que teñen máis dificultades? Si é certo que temos titulacións que non completaron a matrícula. Dáse a circunstancia de que son as titulacións que están máis altas no ranking de Shanghai. O que quere dicir isto é que este é o mellor sitio de Galicia para poder estudar estas titulacións, que, ademais, teñen pleno emprego. Penso que son carreiras nas que a xente non remata de ver as enormes posibilidades laborais que teñen. Quero mencionar o caso de agraria, que, se ben é certo que non se encheu, os datos foron moi bos porque logramos triplicar o alumnado do ano pasado. Eran 45 prazas e creo que hai algo máis de 30 inscritos. Algo pasa coas titulacións de ciencias, que vostede, como exdecano, coñece ben. Son excelentes, pero non acaban de atraer alumnado. Hai algún plan específico? O plan desenvolveuse o ano pasado e está sendo exitoso. O caso de agraria dá boa fe. Insisto en que se descoñecen as grandes posibilidades laborais que teñen. A xente pensa en Enxeñaría Agraria e pensa que vai traballar no campo e, hoxe en día, é unha profesión moi modernizada. Ata os tractores son como “Roombas”, teledirixidos. Así, temos unha campaña para amosar todo isto á poboación e tratar de fomentar vocacións para que tanto Agraria, como Turismo, como Ambientais completen a súa oferta. Xusto menciona agora Turismo. Era un grao que se enchía con facilidade e nos últimos anos está sufrindo. Entendo que a pandemia inflúe, pero que máis pasa? O caso é que se dobrou a carreira na Coruña, entón hai o dobre de prazas. A primeira medida que tomamos foi o financiamento dos desprazamentos, unha beca promovida pola Deputación; e agora pensamos facer unha campaña importante para dar a coñecer as súas saídas profesionais. Turismo non só é traballar de guía, tamén hai xestión hoteleira e moitas máis posibilidades. Vexo unha clara intención de desmitificar os graos. Ese é o camiño? Si. Volvo ao caso de Ambientais ou Agraria. Estas dúas titulacións son as que máis competencias teñen na xestión da auga. Estímase que en 20 anos o 80% dos traballos estean relacionados coa xestión da auga. Non se ve todo o que hai por detrás. O que a xente pensa é só o 10% de todo o que ofrecen. Entón, non hai risco de perder titulacións, non? De momento, non. Agraria era a que máis perigo tiña, pero fixemos un convenio coa Xunta e coa USC para facer o título interuniversitario, para impartilo conxuntamente co Politécnico de Lugo. Xa estamos en conversas para facelo interuniversitario e impulsar a titulación. Semella un plan perfecto para blindar a Enxeñaría Agraria tanto en Ourense coma en Lugo. Xa pensou en que titulacións novas pediría? Temos as nosas ideas, pero non podemos adiantar nada. Dependemos tamén do informe da Xunta sobre as necesidades de titulacións. Penso en cousas relacionadas coa auga. Estaremos de acordo en que o Campus quedou pequeno. O último que se sabe da ampliación foi o concurso de ideas para o concurso do edificio de Aeronáutica. Que avances hai dende aquela? Xa está seleccionado o proxecto que se vai facer. Agora estamos na fase de licitación para que se poida empezar a obra canto antes. Os de Aeronáutica levan demasiados anos dispersados en diferentes edificios e, grazas a ter o Campus Auga, puidemos metelos nalgún lado. Iso dará un pulo tremendo. Outro exemplo é Relacións Internacionais, que tampouco ten edificio propio. Hai que darlle identidade a cada titulación. En resumo, temos unha necesidade de espazo moi importante. Tema Campus Auga. Levamos anos escoitando que a especialización está a piques de chegar e semella que nunca chega. Canto falta en realidade? Queda nada. Xa entregamos toda a documentación e nos próximos meses teremos noticias sobre a especialización. Penso que antes do Nadal teremos a resposta dos avaliadores. A especialización chegará antes do 2024. Teño moita confianza no traballo que se fixo. Vostede é investigador e a investigación é fundamental no Campus. Que hai pensado para impulsar isto? Ampliar espazo tamén é vital para este tema. Temos tres institutos que teñen unha investigación altísima e que están en moi bos postos de partida para pasar a ser centros. Lembremos que Ciencia e Tecnoloxía dos Alimentos somos o número un de Galicia e estamos no top 75 das mellores do mundo. Algo así, para un Campus coma este, é unha barbaridade. Pasado o primeiro inicio de curso. Que cambiaría de cara ao ano que vén? Sería moi importante ter máis residencias para os alumnos. O tema da vivenda está complicado. Hai que buscar máis prazas para acoller a toda esa xente que chega de fóra da provincia.Iso é moi importante para a economía da cidade. Outra eiva é a comunicación co resto da provincia. Cal é o próximo reto? O soterramento da avenida Otero Pedrayo. Suporía a transformación definitiva do Campus. Recibimos o apoio de todos os partidos e institucións na campaña electoral e esperamos poder levar adiante este proxecto.