González Tosar na Arxentina ou volver á patria anterior en Ourense

O escritor ourensán, nado en Bos Aires (1952) e presidente da Fundación Ínsua dos Poetas, Luís González Tosar, volveu á súa terra natal para desenvolver un programa de actividades sobre Francisco Fernández del Riego. Convidado por 27 institucións galegas de Bos Aires, entre elas o Centro do Partido do Carballiño, Tosar dará varias conferencias vinculadas á Semana das Letras Galegas. Os centros de Buenos Aires celebran con Tosar as Letras Galegas Tosar transmite a súa emoción e glosa a viaxe que del Riego realizou en xullo de 1954: “Foi acompañado pola súa dona á capital arxentina. Foi unha data moi importante, posto que o Centro Gallego convidouno ás Xornadas Patrióticas arredor do Día de Galicia nas décadas dos 50 e 60”. Alí reuniríase cos máis destacados intelectuais galeguistas como Álvaro Cunqueiro, Ramón Piñeiro, Valentín Paz Andrade e Ricardo Carballo Calero. Castelao, falecera catro anos antes. “A presenza de Fernández del Riego en 1954 obedece a motivos políticos, tamén culturais, a criterios distintos de reorganización do nacionalismo, tanto na Galicia territorial como en América. O núcleo principal era Bos Aires, onde radicaban case medio millón de galegos”, aclara Tosar. O galeguismo, coma todos os movementos, enfrontou opinións e perspectivas dos exiliados, con intereses distintos segundo os países, e dos que permaneceron na terra. O presidente da Ínsua asegura que a influencia de Del Riego foi decisiva naqueles intres: “Del Riego tiña fortes vínculos coas asociacións da emigración, colaboraba na prensa da colectividade desde os anos 30 e, despois da Guerra Civil, retomara o contacto co seu amigo Luís Seoane e outros exiliados en Bos Aires”. “Os nacionalistas da Irmandade Galega (denominación do Partido Galeguista en América) tiñan moito interese na súa visita” polo feito de ser un dos fundadores do grupo Galaxia, creado en 1950 . En definitiva, “a súa viaxe serviu para achegar posicións, aínda que as estratexias seguiron sendo distintas”, afirma o escritor. Con todo, Tosar advirte de que “hai evidencia das tensións mostras da diverxencia política na correspondencia, máis ben críptica, cruzada con Del Riego despois da súa estancia porteña. Por exemplo con Rodolfo Prada e Eduardo Blanco Amor”. Fala, a modo de cita, dunha carta entre Francisco Fernández del Riego e Eduardo Blanco Amor, do 27 de setembro de 1954 que reza: “O mal entendido que se produxo, impediume, exportar o proxecto que eu tanto agarimaba...”. Pero as discrepancias xurdidas naqueles anos non significaron un impedimento para a actividade literaria, que seguiu, primeiro na clandestinidade, coa grande aportación dos escritores no exilio e, despois da ditadura franquista a abrirse camiño, ata chegar ós nosos días. Xornada da Feira do libro na capital Luís González Tosar tamén estivo presente no acto de peche da Feira do Libro de Buenos Aires. O escritor interviu cunha charla sobre a presenza de Francisco Fernández del Riego na capital porteña e falou dende o máis profundo coñecemento, xa que a súa obra atópase fondamente ligada á realidade emigrante. O escritor Antonio Requeni, membro da Academia Argentina de Letras, acompañou a Tosar, e resaltou a súa traxectoria como vínculo entre as letras galegas e a literatura arxentina. Á charla asistiu un numeroso público “descendentes, fillos e netos de vellos emigrantes” do que Tosar destacou “o entusiasmo que teñen por descubrir as súas raíces, por estar ó tanto da actualidade da cultura galega, pola realidade da Galicia do século XXI”. Os presentes puideron deleitarse coa música do gaiteiro Alberto López, responsable do grupo folk Sete Netos. O gran acto das Letras Galegas 2023 terá lugar mañá, 18 de maio, no Centro Galicia de Bos Aires, convocado por todos os galegos e galegas da Arxentina.