Jacobo Rey: "Ninguén pensa hoxe en ir ao rural sen bo internet"

Máis de 3.000 nenos de 0 a 3 anos na provincia de Ourense comezaron o curso nas escolas infantís de xeito totalmente gratuíto, independentemente de matricularse nun centro público ou privado. Esta medida pioneira en España xurdiu da Consellería de Política Social, que avanza noutros obxectivos de conciliación, especialmente no rural. Jacobo Rey, director xeral de Familia, Infancia e Dinamización Demográfica, mantén reunións periódicas para abordar o reto demográfico, con gran importancia para Ourense. Participou na conferencia sectorial para o reto demográfico. Que plans hai para Ourense? Estamos avanzando nos fondos que imos recibir para proxectos singulares no ámbito demográfico. A Galicia correspóndenlle catro millóns de euros, que se destinarán a proxectos de ámbito demográfico, forestal e de bioeconomía. Estamos traballando na definición das iniciativas. En Galicia, tamén se aprobou a primeira Lei de Impulso Demográfico de España, que é de referencia para outras comunidades. Nalgunhas actuacións somos pioneiros: a extensión da gratuidade das escolas infantís, a Tarxeta Benvida ou o proxecto de casas niño que en Ourense ten un peso importante. Proxectan máis casas niño en Ourense? A metade das casas niño que van funcionar no curso 2022-2023 en Galicia están na provincia de Ourense. En cuestión de semanas, vanse poñer en marcha dúas novas casas en concellos que non tiñan ningún recurso de conciliación: Verea e Pontedeva. É un proxecto que está funcionando moi ben. É moi importante para lanzar esa mensaxe ás familias que viven nestes concellos e non teñen que desprazarse ás cabeceiras de comarca para ter esta posibilidade de conciliación. Van ser case 50 as casas niño que vai haber funcionando na provincia de Ourense este curso. Que importancia ten o rural nas políticas de conciliación que lideran? Unha importancia total. Hai q ue ter en conta a poboación de Ourense, unha provincia con moita dispersión. Se non actuamos neste ámbito, a xente acabará marchando ás cabeceiras de comarca e de aí a núcleos máis poboados. Nos concellos do rural hai unha calidade de vida incomparable ás grandes cidades. Se lle sumamos que agora temos novos recursos, como o teletraballo, dan unha oportunidade de poder vivir no rural. A partir da pandemia notamos que houbo unha volta ao rural, concellos que perdían agora recuperan poboación porque poden ofertar eses servizos que non existían. Se conseguimos ofertar todo iso e que haxa un nivel de emprego axeitado, temos moitas oportunidades. A pandemia cambiou as prioridades da administración? Pénsase nos núcleos máis pequenos? A pandemia provocou un cambio de paradigma na cidade á hora de valorar a calidade de vida que se oferta no rural. Temos que seguir potenciando que a xente que queira vivir no rural, poida vivir no rural. O evidente é o teletraballo. O principal inpedimento ata agora era a falta de conectividade. Coa banda ancha de alta calidade, os concellos do rural van poder competir perfectamente coas grandes cidades. A banda ancha de calidade non chega a todo o mundo no rural. Influirá nas súas estratexias e no obxectivo de asentar poboación. Está claro. Internet é un dos motivos principais que favorece ou perxudica o asentamento da poboación. De feito, ningunha familia a día de hoxe, salvo ermitáns, pensa en ir a vivir a ningún sitio sen conectividade. Como funcionan as axudas á natalidade na provincia? Temos implantada desde 2016 a Tarxeta Benvida, que cubre os gastos da chegada dun fillo a unha familia. En Ourense, máis do 80% dos nenos que nacen na provincia reciben esta axuda cada ano. Hai outras comunidades que xa están imitando estas axudas. Non imos dicir dende a Xunta ás familias que teñan un neno, pero queremos deixar moi claro que toda familia que queira ter un fillo saiba que vai recibir a maior axuda posible. Inflación, subida de prezos… Onde vai pór o foco Política Social fronte a esta situación? Somos conscientes de que unha inflaión ao 10% afecta directamente ás familias. Por iso é importante tomar medidas que vaian directamente á economía das familias. Encaixa nisto a decisión de implantar a gratuidade nas escolas infantís. As familias aforrarán entre 1.500 e 2.000 euros por curso. Un dos grandes proxectos de Política Social que agarda Ourense é a residencia de maiores do Pino. En que punto está? Para nós é unha pena que Ourense vaia ser unha das últimas cidades que teña esta residencia rematada, coa necesidade que hai de aumentar a oferta de prazas para a cidade. É unha pena porque nos vemos que en Santiago o centro está moi avanzado e vai ser cuestión de meses que esté operativo. En cambio, en Ourense, polos impedimentos de certos grupos políticos, ese proxecto estivo totalmente paralizado. Tivo que ser a intervención directa da conselleira de Política Social a que consegiu desbloquear o proxecto. Por moito que avancen, entendo que o proceso será longo. O máis difícil xa está, o noso interese é que a maior brevidade estén en marcha as obras. E coa lástima de que Ourense sexa das últimas en ter en marcha esta residencia. Os cidadáns saben perfectamente o que pasou con ese proxecto. Agora queda acelerar o máximo posible a tramitación da obra. E o centro de discapacidade? Estase facendo o maior esforzo posible para reactivar as obras canto antes, nesta situación complexa de alza de prezos.