Maribel Doval: “Ás universidades preocúpanos o problema global de saúde mental”

A finais do 2023 e despois de tres licitacións desertas para contratar novos profesionais que se encargaran do gabinete psicopedagóxico da UVigo, o contrato da empresa que realizaba o servizo expirou. Isto creou certa alarma por parte dalgúns estudantes, os cales protestaron ante a institución presentando firmas e queixas. A vicerreitora de Benestar aclara que a prestación “continúa, pero mudando a ferramenta”. “Agora colaboramos co Colexio Oficial de Psicólogos de Galicia e estamos moi contentos”, afirma. Que é o servizo psicopedagóxico na Universidade? A UVigo, dende hai anos, ofrece ao estudantado un servizo de psicopedagoxía. Este é un servizo para axudar aos estudantes que teñan unha discapacidade e tamén para ofrecer apoio ás persoas que teñan dislexia, discalculia, disortografía, TEA, déficit de atención, problemas como enfermidades raras ou, en definitiva, calquera circunstancia de saúde ou persoal que estea impedindo continuar cos estudos con normalidade. A obriga da Universidade é facer axustes para adaptarse ás necesidades destes estudantes co gallo de eliminar barreiras arquitectónicas para desprazarse con autonomía, incorporar intérpretes de signo e equipamento adaptado ás necesidades, entre outros. Tamén procuramos unha mellor adaptación aos exames ou dar maior tempo cando cómpre. A maiores, a UVigo fai axustes con titorías que atenden e axudan con todo tipo de diversidade, en casos moi excepcionais. Esto último enmárcase nun programa chamado Piune. Todo isto vai acompañado dun sistema de axudas en colaboración con outras institucións. Nós o que facemos é que cando un estudante non é capaz de avanzar nos seus estudos, solicita a alta neste programa da diversidade e, tras unha primeira revisión, envíase a solicitude e tómanse as medidas convenientes. Onde se nota máis o servizo? Hai casos que son claros ou que veñen cun diagnóstico dende o instituto que inspiran ao profesorado as medidas e o equipamento que podemos trasladar ás nosas aulas, pero no caso de que non traian eses informes contactamos con profesionais da psicoloxía para que poidan facer unha diagnose e establezan unhas pautas a seguir. Para este tipo de acción a UVigo contou cunha empresa externa, pero o contrato rematou e lanzou unha licitación pública varias veces sen éxito. Debido a esta ausencia, nós agora colaboramos co Colexio Oficial de Psicólogos de Galicia e estamos moi contentos. Segue a existir o servizo, pero mudou o procedemento? Si. A Universidade está moi comprometida coa saúde psicolóxica dos seus estudantes e coa integración da diversidade. Segue o servizo, pero cambiou o instrumento ou o lugar onde se recibe o apoio profesional. A desinformación e o cambio segue a causar certo recelo por parte dalgúns estudantes. Aínda así, o novo proceso facilita que os seus casos non teñan que pasar pola institución e que o estudante poida brillar sin que ninguén saiba o que padece. Agradecemos moito ao Colexio de Psicólogos pola súa axuda e sabemos que cada vez máis institucións colaboran desta mesma forma e agora calquera estudante con calquera malestar que lle afecte ao rendemento académico pode acudir a este servizo de apoio psicolóxico escribindo a diversidade@uvigo.es. Hai alumnos que non queren inscribirse no programa, pero sí recibir axuda en determinado momento. Procuraremos darlle a máxima prioridade posible. Cal é a situación en Ourense? Todas as Universidades estamos preocupadas polo problema de saúde mental que está habendo de forma global e, por iso, insistimos en que traballar pera mellorar a saúde é cuestión de todos. Nós só podemos axudar na parte que compete ao académico. Colaborando co Colexio de Psicólogos somos máis conscientes de que estes profesionais están moi saturados de traballo e a algún alumno lle toca esperar un pouco, xa que os profesionais están moi saturados e a falta de persoal no sistema afecta na atención. Os casos máis urxentes proceden a atenderse antes, por exemplo. No caso de Ourense, non é o Campus que máis solicita esta axuda, pero si tivemos que derivar alumnos a Pontevedra para que puidesen recibir o servizo. Seguen recibindo firmas do Campus sobre estas queixas? Si, e se procurou aclarar a confusión. Entendemos que o sistema novo poida dar lugar a algún atraso, pero a UVigo está comprometida coa saúde integral. Aínda queda sensibilización para que o estudantado con discapacidade non se sinta abrumado á hora de recibir axuda.