Na procura da campá do La Isla

A madrugada do día 4 de otubro do 1970 íase a pique a carón da Torre de Hércules o pesqueiro La Isla, cando voltaba ao porto de A Coruña cunha boa marea de pescadas do Gran Sol. Neste tráxico naufraxio faleceron 14 dos seus 15 tripulantes. Un dos mariñeiros que perderon a vida neste fatal sinistro marítimo, foi José Manuel Quiroga Bouzo, segundo maquinista e natural da cidade de Ourense, urbe onde sería soterrado pola súa familia días despois de que o mar devolvese seu corpo. O 15 de febreiro do 1971, súa viúva María Dolores Bazarra Vila á que acompañaba o pai do malogrado mariñeiro, José Quiroga Fragoso, que fora tenente alcalde da cidade de Ourense, trasladáronse dende a cidade de As Burgas ata a de A Coruña, para facerlle entrega ao presidente do Club del Mar de San Amaro, José Portela Fuentes, dunha placa conmemorativa en agradecemento ás labouras humanitarias que levaron a cabo os submarinistas desta entidade, na rescate dos corpos dos infortunados mariñeiros e entregaron a todos os tripulantes do pesqueiro Segundo Isabelita e ao mariñeiro Pepiño (socio do Club del Mar) unha insiña de ouro da cidade de Ourense en agradecemento tamén ás labouras de rescate dos náufragos. Roberto Diehl, fundador da Escola de Buceo deste senlleiro clube e, membro destacado deste equipo de afoutos mergulladores agradecendo tan noble xesto, entregoulles aos familiares de José Manuel Quiroga Bouzo dous obxetos que os buzos do Club del Mar extraeran do pecio do La Isla: a campá do barco que levaba a inscripción co seu nome e unha virxe do Carme que ía dentro da ponte. Pasaron xa cincuenta anos deste naufraxio…medio século que se cumplirá o vindeiro 4 de outubro do 2020. Mais para os que somos de Montealto, o noso barrio- república que está rodeado de mar, onde se ergue o faro máis antigo do mundo en funcionamento e onde moitos dos nosos veciños e familiares comezaron a nadar antes que a camiñar, a traxedia marítima do pesqueiro La Isla segue na memoria colectiva desta península habitada que desafía ao Atlántico. Ainda lembro as historias de Nenucho, Diego e Milucho, grandes percebeiros do barrio que tiñan bautizadas cada pedra, baixo, furna ou punta, dende Touriñán ao Cabo Prior. Foran as súas conversas mareiras as que falaban a cotío da traxedia do Isla, afundido aos pés da Torre, entre O Boi e A Vaca, que xunto ao Becerro e O Becerriño, forman un grupo de pedras e baixos cuios talasonímicos ou topónimos costeiros repítense nas costas de Escocia e de Irlanda. A fartura do mar das Nacións Celtas, simbolizado polos nosos antergos coa tradicional familia de bóvidos… Entre os veciños de As Lagoas, ainda seguen moi vivos os laios e os berros dos náufragos deste pesqueiro que na escuridade da noite primeiro e coas primeiras luces do día despois, foron desaparecendo baixo as augas engulidos polo bravo océano á vista da impotente veciñanza que non puido facer nada para rescatalos, chorándoos, como se das súas propias familias se tratasen. Achégase a data do 4 de outubro do 2020 e a pesares da loita contra o tempo e contra a propia pandemia do Covid 19 que resístese a nos abandoar, catro teimudas asociacións e entidades, seguimos na procura de atopar a campá do pesqueiro La Isla para que poida ser admirada na futura exposición monográfica sobre este naufraxio que se inaugurará na sala de exposicións do Club del mar de San Amaro, na cidade de A Coruña, a fin de semana do 3 e 4 de outubro deste ano. Onáufrago, José Manuel Quiroga Bouzo, finou con 27 anos. A súa muller xa fai anos que non vive e a filla que tiña en común o matrimonio, morreu nova. O resto de irmáns Quiroga Bouzo, Luis Miguel (antigo comisario de Policía) Ana María (funcionaria) e María Teresa, Teté Quiroga a famosa pintora artística, por desgraza finaron tamén. Semella que a sorte énos esquiva, porén, aproveitando a oportunidade que dende este espazo nos brinda o xornal ourensán, La Región, facemos un chamamento a todos os lectores deste artigo por se teñen algunha pista ou saben dalgún familiar ou achegado desta coñecida familia ourensá que poidese botar luz sobre o paradoiro da campá do pesqueiro La Isla, para que nolo fagades saber, por favor. Agardamos a vosa axuda para rescatar un anaco da nosa historia marítima. Somos salitre.