O magosto. Que empece a troula!

As celebracións dos magostos deron onte o pistoletazo de saída na cidade, con varias festas e homenaxes ao patrón San Martiño. Os ourensáns están entregados a unha das festas por antonomasia da urbe. Castañas, chourizos, lacón, empanada, viño, licor café, bica… Nada faltou nas celebracións que onte celebraron na Asociación de Veciños do Casco Vello, na rúa Liberdade, e no Campo da Feira, onde se reuniu máis dun cento de militantes e simpatizantes do PSOE. No Casco Vello, os veciños comezaron a festa ás 19,30 horas até ben entrada a madrugada, unha iniciativa para “facer barrio” e irmandar os veciños da zona histórica, na que ninguén quedou sen comer nin beber, á calor das brasas e a cuberto, no local da asociación, para desafiar as constantes chuvias da xornada de onte. Empanada, lacón, chourizos… Unha troula de campionato. Tamén a cuberto, neste caso no Campo da Feira, a agrupación municipal do PSOE fixo o seu tradicional magosto para todos os públicos, ao que asistiron máis dun cento e persoas e no que houbo música e actividades para os nenos. O menú foi a base de empanadas, chourizos e, por suposto, castañas. Para completar o día, a Sociedade Filatélica Numismática e Vitolfílica Miño inaugurou a a XXXIII Exposición Filatélica-Mostra de Coleccionismo San Martiño 2023, que estará aberta até o 19 de novembro no Liceo. É unha mostra dedicada ao coleccionismo na que se poden ver as xa tradicionais de filatelia e numismática, xunto a outras que reúnen bitolas, décimos de lotaría, cartóns postais, dedais… Hoxe, día do Patrón San Martiño, a cidade encherase de actividade. Como é tradición, celebrarase a solemne Misa de San Martiño, ás 11,30 horas na Catedral. A eucaristía será oficiada polo bispo da Diócese, monseñor Leonardo Lemos Montanet. A Coral De Ruada, como é habitual, participará na cerimonia cos seus cantos. Previamente, a corporación acudirá acompañada de gaiteiros cara á Catedral, en procesión. Máis aló dos actos relixiosos, os magostos tomarán todos os recunchos do municipio. No núcleo urbano, haberá magosto popular organizado polo Concello ás 18,00 horas na Praza Maior e a Praza de Santa Eufemia. Haberá bolos preñados, porco ao espeto, bebidas e castañas gratuítas. Tamén unha ruada de gaiteiros con xigantes e cabezudos, un concerto de Brañas Folk, ás 19,00 horas, na Praza Maior, e unha actuación da orquestra A Misión no Progreso e unha sesión dj en Santa Eufemia. Ademais, durante a xornada, os máis novos volverán subir a Montealegre para celebrar a xornada entre amigos, mentres que decenas as asociacións de veciños celebran esta xornada con multitudinarios magostos.