Consciente de que modificar a Carta Magna é un asunto "complexo e delicado", puntualizou que antes de iniciar esa vía hai que saber que se quere facer"
O líder do Executivo estatal e xefe de filas do PPdeG, Mariano Rajoy, mostrouse firme este mércores en que non negociará ningún tipo de mecanismo encamiñado a quebrar "a unidade de España". "É evidente que mentres eu sexa presidente do Goberno non vou falar da liquidación da soberanía nacional", resolveu.
Nunha visita ao concello ourensano de Celanova, tras percorrer unha parte das obras de entrada da AVE en Galicia, o mandatario expresouse nestes termos ao ser preguntado polos xornalistas sobre o proceso catalán e sobre a posibilidade de reformar a Constitución para modificar o estatus de Cataluña.
Consciente de que modificar a Carta Magna é un asunto "complexo e delicado", puntualizou que antes de iniciar esa vía hai que saber que se quere facer" para, posteriormente, buscar "o máximo consenso". Precisamente por iso, pospuxo calquera movemento neste sentido ata a próxima lexislatura, pois o final dun mandato non é, ao seu xuízo, o momento propicio para lograr grandes acordos.
E á tensión propia do momento preelectoral, que de por si dificultaría a busca de pactos, sumou Rajoy o feito de que "en Cataluña hai quen está formulando, e non dende un partido político, senón dende a Generalitat, a liquidación do principio básico da Constitución", que é "a unidade de España e a soberanía nacional".
"Non vou aceptar que se poña en tea de xuízo a unidade de España", resaltou o máximo mandatario estatal, tras recalcar que "o que sexa España o decidirán todos os españois e non unha parte deles". "A partir de aí, pódese falar", manifestou ao ser cuestionado en concreto sobre a visión do deputado (UDC) Josep Antoni Duran i Lleida sobre que a "solución" para Cataluña pasa por incluír "unha disposición adicional que recoñeza a identidade" da súa comunidade.
"HAI COUSAS QUE o MEU PARTIDO NON VAI ACEPTAR"
Sen deixar de advertir que calquera eventual reforma constitucional non se abriría ata a próxima lexislatura, Rajoy deixou claro que "hai cousas" que o seu partido, o PP, "non vai aceptar nunca". En concreto, citou a ruptura da "soberanía nacional", da "igualdade entre todos os españois", "da "liberdade e os dereitos fundamentais" e da "solidariedade entre cidadáns".
"Deses principios non nos imos mover", incidiu, pois son --dixo-- "principios clásicos" do constitucionalismo español que están vixentes tamén "na inmensa maioría" dos países da Unión Europea.
Polo tanto, concluíu que "quen queira falar" da ruptura de España "dende logo" non poderá facelo con el. "Do demais pódese falar, pero estes temas corresponden ao 100% dos españois e non só a uns poucos", resolveu, e declinou pronunciarse sobre os "comentarios" do líder do PSOE, Pedro Sánchez, sobre que o PP non poderá pilotar a reforma da Constitución.
