Un novo formato de presentacións rápidas dará un maior impacto aos traballos dos 32 investigadores
Naceu coa vocación de fomentar a cooperación e a interdisciplinariedade que tanto se precisa no ámbito do desenvolvemento de materiais avanzados capaces de rexenerar tecidos danados e chega agora á segunda edición apostando polos novos investigadores. O II Foro da Rede Galega de Biomateriais celebrarase o 9 de outubro na illa de San Simón, alí expertos de toda a Península reuniranse para poñer en común os avances dos seus traballos e os retos aos que se enfrontan. A organización porá en marcha un novo e orixinal formato de relatorios e presentacións rápidas que permitirá poñerse ao día nunha única xornada de 32 investigacións que se están a levar a cabo nas áreas do deseño, a produción, a caracterización e a aplicación dos biomateriais.
A sesión estará dividida en dúas partes, unha na que 12 científicos senior disporán de 20 minutos para expor as liñas xerais dos seus traballos e outra na que uns 20 investigadores terán que concentrar os seus discursos en tres minutos. Este novo formato, “máis interesante que os tradicionais pósters”, axudará a todos os poñentes a ter “un maior impacto” ao poder dirixirse a todo o auditorio, como asegura Pío González, coordinador da Rede Galega de Biomateriais (RGB) e investigador da Universidade de Vigo. Segundo González, “a idea é darlle a oportunidade a todos aqueles investigadores e investigadoras que desexen presentar a súa liña de traballo, especialmente ao colectivo máis novel que está a realizar a súa tese de doutoramento”.