O campamento infantil de Amencer chegou ao seu fin onte xoves e logo de nove días repletos de iniciativas para os máis mozos. Nesta 35 edición participaron un total de 540 nenos e nenas que contaron coa vixilancia e dinamización de parte de 70 voluntarios. Para clausurar o campamento houbo sesión de discoteca e música e festa da escuma.
A continuación celebrouse un xantar en Salesianos. As pastelerías de Ourense colaboraron co evento agasallando aos rapaces cun postre.
A organización entregou aos cativos un diploma acreditativo da súa participación antes de poñer o broche de ouro cunha foto de grupo. O xerente de Amencer, Xulio César Iglesias, amosou a súa satisfacción coa participación obtida nesta quenda que, aínda que non chegou a niveis de prepandemia, incrementouse notablemente.
Este venres, de 10,30 a 12,30 horas, levarase a cabo a avaliación do campamento e as 13,00 horas farase a foto na pirámide de cordas ao carón do Barbaña.
