A fin de semana Allariz viviu a recta final da Festa do Boi cunha celebración coa que as rúas se encheron de actividades e música como complemento ás saídas do boi percorrendo o Casco Antigo da vila.
Os pasarrúas das charangas Sugarri, Treboada dos Zes Pereiras, Alambique, Mekanica Rolling Band e a Murga Achicoria animaron musicalmente as últimas xornadas de festa co seu trepidante ritmo que convidaba ao baile. Non faltaron as saídas do boi, nin a do boi para a cativada da casa. A despedida de Xan de Arzúa e o seu traslado ata a Casa do Boi puxeron o broche final a dez días de intensos festexos.
