Junto com Neira Vilas e Fernández del Riego, entre os galegos felizmente aínda vivos, Isaac Diaz Pardo é sem dúvida alguma a personalidade galega de maior dignidade que temos. O seu nome terá que figurar sempre com letras de ouro na listagem dos bons e generosos que deu Galiza ao largo da história. O labor realizado por Isaac a prol da nossa cultura é tam extraordinário que resulta impagável. Por isso, com bom critério, organizado pola AGAL (Associaçóm Galega da Língua), o dia 12 do presente mes às 8 da tarde, na sala de actos da biblioteca Ângelo Casal de Compostela, terá lugar um acto de homenagem a Diaz Pardo. Ao que estam convidados todos os galegos e galegas com sentimentos. E no que se espera participem várias autoridades autonómicas, convidadas para tal fim.
O passado dia 17 de maio, festividade das Nossas Letras, a AGAL tirou do prelo um livro de homenagem a este egrégio e singular galego. Baixo o título de Isaac Diaz Pardo e a Língua, dentro de uma nova colecçóm denominada Testemunhos, recolhe uma antologia dos seus artigos centrados esencialmente na língua e cultura da Galiza. Som em concreto 16 breves textos de entre tres e oito páginas. Entre eles destacamos os titulados Os problemas da língua manifestam-se de formas muito diversas, O problema da língua visto por um que nom é filólogo, O galego e o português, Sobre a cultura galega, A propósito da língua galega e Espanha, Portugal e Galiza. O volume, que se vende por dez euros, inclui também uma entrevista realizada por Sole Rei ao homenageado, no que este, entre outras cousas, di: O galego está a morrer, se nom se abrir à naçóm irmá e Eu creio que a Academia Galega fai moi bem em todas as cousas, menos no da língua galega.
O livro que comentamos, por certo de muito fácil e amena leitura, acolhe ao princípio uma ampla introducçóm temática. Na que aparecem estudos e trabalhos da autoria de José Mª Casariego sobre a vida e a obra do autor. De Isaac Estraviz sobre o autor e a memória histórica. Do presidente da AGAL, Alexandre Banhos, no que sinala que Isaac está acreditado entre os galegos bons e generosos. Do professor da Universidade de Vigo em Pontevedra, Martinho M. Santalha, que escreve sobre o pensamento lingüístico de Diaz Pardo. Finalmente recolhe-se um artigo do que suscreve este, publicado no seu dia também no nosso La Región, titulado A dignidade de Diaz Pardo.
Como é natural, no acto de Compostela citado mais acima, será apresentado este livro publicado pola AGAL, que já se encontra nas livrarias galegas e portuguesas. O acto, que contará com a presença do homenageado, como é lógico, completara-se com intervençoes orais e com peças musicais e teatrais. Como admiramos e apreciamos a este grande galego, faremos todo o possível por estar fisicamente ao seu lado neste acto tam merecido para a sua pessoa.
(*) Professor Titular da Faculdade de Educaçóm de Ourense