No 2023 melloraron os datos de taquilla rexistrados no 2022, aínda que os resultados se consideran lonxe dos da prepandemia. Se en 2019, os cines españois recadaban 624 millóns, agora mesmo a cifra atópase en 485. Tampouco o fenómeno “Barbenheimer” conseguíu compensar un ano marcado pola folga de actores e guionistas, e onde a única película española en entrar no top ten dos filmes máis vistos foi Campeonex de Javier Fesser con case dous millóns de espectadores. A pesar dos datos non moi reconfortantes, o 2023 foi un ano de moi boas películas e o 2024 tamén ven cargado de grandes estreas.
Na primeira metade de xaneiro temos xa varios títulos interesantes. O primeiro é Los que se quedan de Alexander Payne, onde se prevé un retorno do cineasta á dramedia das súas mellores películas como Nebraska (2013) ou Entre copas (2008). Yo capitán do director de Gomorra, Matteo Garrone - León de Plata á mellor dirección na última edición do Festival de Venecia – chegará ás salas nestas mesmas datas. O filme narra a odisea contemporánea de Seydou e Moussa, dous mozos que abandonan Dakar para emprender camiño a Europa, enfrentándose aos peligros do deserto e do mar.
Outra triunfadora do Festival de Venecia é Pobres criaturas de Yorgos Lanthimos que chegará as salas nestas datas. O director grego volve a traballar con Emma Stone para confeccionar unha fábula feminista orixinal e provocadora.
Zona de interés de Jonathan Glazer, o Gran Premio do xurado no último Festival de Cannes, é outras das grandes estreas do mes de xaneiro. É un filme sobre o holocausto e a banalidade do mal. Sen rastro visual de violencia, o filme cóntanos a historia do comandante de Auschwitz Rudolf Höss e da súa esposa Hedwig mentres se esfórzan en construír unha vida de ilusión nunha casa con xardín preto do campo de exterminio. Perfect Days, o drama xaponés de Wim Wenders, así como o romance lituano Slow da directora Marija Kavtaradze, chegarán tamén ás salas en xaneiro.
La tierra prometida, un drama histórico ambientado no 1755 e protagonizado por Mads Mikkelsen e Amanda Collin e dirixido polo danés Nikolaj Arcel, estrearase en febreiro. Nese mesmo mes regresará tamén o aclamado director Todd Haynes cun novo melodrama feminino protagonizado por Natalie Portman e Julianne Moore: Secretos de un escándalo.
Neste 2024 tampouco faltarán os biopics. Os amantes deste xénero atoparán entre febreiro e marzo, catro títulos. O primeiro será Ferrari do mestre da acción Michael Mann. A película céntrase sobre o verán do 1957, cando Enzo Ferrari decidiu arriscar todo nunha única carreira: a Mille Miglia.
Outro biopic é Priscilla de Sofia Coppola. Está baseado nas memorias “Elvis and Me” escritas por Priscilla Beaulieu Presley, e que relatan o noivado e o turbulento matrimonio entre ela e Elvis. Priscillla parece afastarse do estilo exuberante de Baz Luhrman que nos contou hai pouco a vida de Elvis Presley, para abrazar un corte máis realista e intimista.
One Love de Reinaldo Marcus Green levará á pantalla a vida da lenda do reggae Bob Marley mentres La última sesión de Freud dirixida por Matt Brown e ambientada en vésperas da Segunda Guerra Mundial, reconstrúe o encontro de pai da psicanálise Sigmund Freud co icónico autor C.S. Lewis. Dune: Parte Dos de Denis Villeneuve é unha continuación directa da película estreada no 2021. É un filme que fará felices os amantes da ciencia ficción e chegará as pantallas grandes en marzo.
Sempre no mes de marzo estrearase Dos chicas a la fuga, o primeiro filme de Ethan Coen sen a colaboración do seu irmán. Estas datas marcarán tamén o regreso ao cine de Bong Joon-ho, director de Parásitos, co filme Mickey, baseado sobre o libro de Edward Ashton.
How to have sex de Molly Manning Walker e Rivales de Luca Guadagnino serán dúas películas onde o sexo terá un papel protagonista. Outras estreas que se prevén interesantes neste 2024 son as de Club Zero de Jessica Hausner, de El mal no existe de Ryusuke Hamaguchi e a de Honeymoon, unha dramedia de Enrique Otero protagonizada por Javier Gutiérrez e Nathalie Poza que terá a súa estrea o 12 de xaneiro.
Por último, xa na segunda metade do ano, destacamos tres secuelas. O primeiro é Folie A Deux de Todd Phillips. O filme marcará o regreso do Joker interpretado por Joaquin Phoenix que esta vez estará acompañado por Lady Gaga no papel de Harley Quinn.
Mentres outras secuelas esperadas serán Gladiator 2 dirixido por Ridley Scott que chegará as salas de cine en outono e Cazafantasmas: Imperio helado que terá a súa estrea en marzo.
Os festivais de Berlín, Cannes, Sundance, Venecia e San Sebastián, marcarán a axenda doutras importantes estreas, sobre todo españolas. Algún título premiado poderá verse xa ao longo deste 2024.
