Antonio Pernas foi galardoado co Premio 'Juana de Vega' de Arquitectura por unha vivenda deseñada en Aldea de Arriba (Bergondo), na Coruña, da que o xurado valorou o seu compacto deseño e alta eficiencia enerxética.
Os accésit foron para Óscar e Iván Andrés Quintela (Arrokabe Arquitectos) por unha obra nas proximidades de Lavacolla (Sabugueira do Carballal), e Pablo Menéndez por unha construción na Caeira (Pontevedra).
Tamén se concedeu unha mención especial como finalista destacada á obra de rehabilitación de Estefanía Vázquez Müller e Roi Feijóo Rei na zona histórica de Ourense.
A sede da Fundación 'Juana de Vega' acolleu hoxe o acto de lectura da decisión e entrega dos premios 'Juana de Vega' de Arquitectura, cos que se recoñece o labor dos profesionais que, cos seus proxectos, contribúen á mellora da calidade de vida no medio rural galego con propostas contemporáneas que se integran no contorno natural adaptándose á calidade paisaxística de cada zona.
O certame, de carácter anual, é o de maior dotación dos que se convocan en Galicia para proxectos de arquitectura e recoñece tanto vivendas unifamiliares de nova feitura como obras de rehabilitación realizadas na Comunidade Autónoma no ano natural anterior á convocatoria.
Do proxecto gañador o xurado destacou a distribución ben organizada con alternativas de mobilidade exterior e interior e o bo criterio no emprego dos materiais (madeira, lousas de formigón prefabricadas e aceiro galvanizado), e valora que contribúen a unha 'harmoniosa relación entre a casa e o xardín'.
Pola súa banda, do traballo dos irmáns Quintela valórase que foi realizado con medios moi limitados e a acertada colocación da edificación sobre o terreo dispoñible.
Finalmente, o xurado destacou a 'eficaz concepción' da edificación deseñada por Pablo Menéndez na Caeira, asentada nun terreo cunha forte pendente e orientado ao sur con espléndidas vistas sobre Pontevedra e a desembocadura do Lérez.
