A alcaldesa de Xinzo, Elvira Lama, presentou este mércores no Salón de Plenos unha guía que recolle os dereitos, recursos, e programas dispoñibles para as mulleres. Este documento, integrado por nove capítulos e máis de 100 páxinas, busca acadar “unha sociedade mellor” por medio da información. Foi redactado grazas ao financiamento do Pacto de Estado do Goberno e a coordinación da consultora RED Talento, unha entidade que, tal e como recordan dende o Consistorio, coñece “de primeira man” a situación das mulleres de Xinzo de Limia e dos concellos da comarca -especialmente Vilar de Barrio e Sandiás-, xa que nestes momentos estase a desenvolver nos tres municipios o Programa Hypatia, financiado pola Xunta de Galicia.
Na introdución desta guía defínese o principio de igualdade, mentres que nos seguintes expóñense os dereitos laborais e de conciliación, ademais dos específicos laborais para as vítimas de violencia de xénero, o dereito á saúde sexual e reprodutiva e os dereitos das mulleres estranxeiras vítimas da violencia de xénero. Por último, explícanse os diferentes recursos e programas de emprendemento. “As mulleres estamos acostumadas a resolver situacións complexas, pero non sempre sabemos hai servizos dispoñibles”, asegurou Lama.
