Allariz recupera, pouco a pouco, o seu habitual movemento social, cultural e lúdico. Neste senso, o Goberno local que lidera a nacionalista Cristina Cid presentou esta semana ás portas da Casa Consistorial a programación deseñada para o periodo estival, integrada por máis de 40 actividades gratuítas e pensadas para todos os públicos.
Xunto ao concelleiro de Cultura, Alberto Conde; Cid desvelou o cartel promocional do verán alaricano, no que destacan actividades como concertos, exposicións, teatro, poesía, mercados especiais ou a promoción dos estudos arqueolóxicos de Armea, dos que se cumplen 10 anos neste 2021. Entre os artistas e grupos musicais que pasarán pola vila alaricana este verán atópanse Cora Velasco, Blues Time ou Soul and Roll. A Banda da Loba será a encargada de festexar, o vindeiro 24 de xullo, o Día da Patria e a Banda Unión Musical de Allariz será a aposta local en clave musical. Destaca, do mesmo xeito, un desfile de Xigantes e Cabezudos que terá lugar o vindeiro sábado, día 10 de xullo, e que estarán acompañados musicalmente por de Par en Par.
Para garantir todas as medidas de seguridade e evitar aglomeracións, elexíronse varios espazos ao aire libre para desenvolver todas estas iniciativas culturais. Trátase do Festival Internacional de Xardíns, o Campo dos Brancos, a Praza dos Carboeiros, O Xardín do Museo do Coiro ou o Campo de Vilanova, entre outros.
Todas as actividades previstas serán de balde para os asistentes. Neste senso, para as que teñan un aforo limitado, será necesario reservar previamente na Casa da Cultura de Allariz cunha marxe de un día.
