O Concello de Allariz, da man da Asociación para a Defensa Ecolóxica de Galicia, dará un novo e importante paso en materia de concienciación ambiental, fomento da reciclaxe e coidado do medio ambiente cunha nova campaña que se prolongará ata o mes de novembro e que incluirá o reparto de novos composteiros entre a poboación e campañas de sensibilización entre os cativos e os maiores. Concretamente, repartiranse 200 novos composteiros de uso individual de entre 450 e 850 litros co obxectivo de recuperar a materia orgánica producida nos fogares que dispoñan de finca, polo que dita acción estará especialmente dirixida aos núcleos rurais do municipio alaricano. Neste senso, dende o Concello de Allariz recordan que, con esta nova entrega, xa habería máis de 500 composteiros repartidos polo municipio e, para poder obter un, será necesario dirixirse directamente ao enderezo electrónico [email protected] ou ben a [email protected] -tamén se pode solicitar no 988 440 001-. Ademais disto promoverase o reforzo e creación de novas áreas de compostaxe comunitaria cun total de 15 composteiros comunitarios de gran capacidade. O obxetivo é superar o 50 por cento na separación e reciclaxe dos residuos xerados en Allariz ao longo do ano 2021.
SENSIBILIZACIÓN
A campaña desenvolvida con ADEGA -e que contará tamén coa colaboración económica da Consellería de Medio Ambiente da Xunta de Galicia e o cofinanciamento, nun 80 por cento, polo Fondo Europeo de Desenvolvemento Rexional, sendo a inversión subvencionable de 41.471,50 euros- tamén incluirá unha parte formativa e de sensibilización social en torno a esta cuestión. Técnicas de ADEGA executarán charlas divulgativas no Colexio Padre Feijoo e no Instituto de Allariz e, do mesmo xeito, tamén se realizarán visitas porta a porta para concienciar aos veciños da importancia da separación, recordando que mais do 40 por cento do lixo que se produce é de orixe orgánica.
Por último, dende o Concello de Allariz recordan que “o compost é fácilmente manexable, non produce malos cheiros e fertiliza a terra mellorando as produción agrogandeira.