O Concello de Allariz pide un consumo responsable de auga no verán

O Concello de Allariz, en colaboración coa empresa encargada da xestión da auga neste municipio -Espina &amp; Delfín-, vén de lanzar unha campaña para promover o seu consumo responsable ao longo do verán. Esta medida é especialmente necesaria agora xa que a vila alaricana duplica a súa poboación durante o periodo estival e, segundo as previsións indican, a escaseza de precipitacións redundará negativamente no abastecemento deste ben á veciñanza. O programa leva por título “Está na túa man, pecha a billa cando toca”, unha mensaxe que se difundirá mediante carteis informativos que se colocarán nos edificios municipais, nas instalacións do servizo municipal de auga e nas redes socias de ambas entidades. É importante, din dende o Consistorio, que os veciños e veciñas de Allariz se sensibilicen nesta cuestión e se anticipen ás posibles situacións de sequía. Esta campaña incide en consellos sinxelos e prácticos para aforrar auga como pechar a billa mentres se realiza o cepillado dos dentes, ducharse en lugar de darse un baño, non usar o retrete como papeleira e empregar a lavadora e o lavalouzas con cargas completas. Por outro lado, dende o Concello piden “precaución” aos veciños á hora de realizar actividades típicas deste época, concretamente, apostan por reducir o uso de auga para encher piscinas, lavar vehículos ou regar os xardíns. Por último, aconsellan ás persoas que marchan uns días de vacacións pechar a chave de paso de auga da vivenda. Reservas hídricas en Allariz Fontes municipais subliñan que para poder manter as reservas hídricas durante o período vacacional é imprescindible “realizar un consumo eficiente da auga potable”. Engaden que, actualmente, a capacidade dos embalses da comunidade galega aínda amosa “boas porcentaxes”, pero o descenso “é continuo”. Na Confederación Hidrográfica Miño-Sil a reserva hídrica atópase nun 62,8 por cento. Bernardo Varela, concelleiro de Medio Ambiente en Allariz, explica que o Arnoia e os manantiais que proceden do Monte Costa San Marcos, con varias captacións, secundan o servizo de augas na vila alaricana. “Hai días que chegamos a cubrir todas as necesidades co que vén de aí, pero no verán eso non é así. Chega únicamente para Nanín e para a zona de Roimelo”, puntualiza o concelleiro. “No periodo estival, Allariz e os núcleos chegan a consumir, en días puntuais, máis de un millón e medio de litros de auga ao día -120 litros por persoa-”, engade. Se a poboación que vive no outono e no inverno na vila ronda os 6.300 habitantes, nos meses de verán pode chegar aos 12.000, di o edil. “Podemos chegar a duplicala. Tamén hai outra xente que vén polo día e fai un consumo”, precisa.