Allariz dará un paso máis na súa promoción turística este verán coa recuperación, logo da gran acollida do ano pasado, das visitas guiadas. Trátase dunha iniciativa que, dende o vindeiro 17 de xullo, o Concello desenvolverá da man de Xeitura na liña de dar a coñecer aos participantes todo tipo de elementos culturais, monumentais, paisaxísticos e patrimoniais vencellados á historia alaricana, prestando especial atención ás súas prazas, igrexas, recursos turísticos, lendas e anécdotas.
A actividade, que se desenvolverá todos os sábados do periodo estival e se centrará no entorno do casco histórico, foi presentada pola edil de Promoción Económica do Concello de Allariz, María López, e por Manuel Gallego, traballador de Xeitura.
Segundo explicaron na presentación, a visita partirá da oficina de turismo de Allariz ás 12,00 horas e terá una duración aproximada de unha hora e media, tempo no que se percorrerá a beira do río Arnoia e o casco histórico de Allariz. Entre outros puntos a descubrir, o Arnado, a Praza Maior, a Paneira, a Igrexa de Santiago, a rúa da Cruz e o Edificio do antigo Xulgado serán paradas inescusables nestes itinerarios.
As visitas desenvolveranse seguindo todas as normativas vixentes do momento contra a covid-19. Entre as medidas coas que se retomará a actividade neste 2021, incluirase a formación de grupos reducidos -de un máximo 20 persoas- con toma de temperatura e uso da máscara. Dado que haberá límite de aforo, deberá reservarse praza previamente na Oficina de Información de xeito presencial, por teléfono chamando ao 988 442 008 ou no correo [email protected]. A tarifa xeral será de seis euros e reducida de tres euros para parados, estudantes e xubilados; sendo de balde ata os 10 anos inclusive.
