Laura Fernández, a cargo da aula Cemit de Celanova: "Os nenos deben usar internet con conciencia"

Poñer ao alcance dos menores coñecementos e ferramentas que lles permitan navegar con seguridade pola rede é unha das premisas da formación en competencias dixitais básicas para menores que, de marzo a xuño, impartirase na aula Cemit de Celanova que leva dez anos de actividade. A seguridade dos menores na rede é algo que preocupa moito? É que os nenos non teñen medo ningún a internet, non son conscientes do perigo que pode carrexar. Nin saben diferenciar entre mundo real e virtual. Apenas hai formación, nin directrices que seguir e, os nenos, por xogar fan o que sexa. O problema, penso eu, é que se dan por feito que saben moitas cousas, e non. Debense traballar máis estes conceptos nas escolas. De quen partiu este curso? Isto foi pensado porque á aula veñen moitos nenos -e os seus pais- aos que lles notabamos e demandaban ferramentas para facer cousas básicas como adxuntar documentos nun correo ou subir arquivos ao Drive, pero tamén en materia de seguridade. Moitos veñen a xogar e lles da igual crear unha conta que cinco, poñen que son maiores de idade, dan datos falsos… pasan un pouco por alto o tema da seguridade. Queriamos explicarlles un pouco todo: información, comunicación, creación de contidos, seguridade e resolución de problemas. Como se chega a eles? Tes que ser como eles, gañarte a súa confianza e que che vexan como un referente. Algo que non se consigue nin a primeira nin á segunda sesión. Espero poder dicir, ao remate deste curso, que os asistentes me fan caso á hora de crear unha conta, de controlar a quen e que datos dan na rede, e conciencialos en materia de seguridade. Que teñan respecto, non medo, as redes sociais e internet. Hai que usalas, pero con responsabilidade e conciencia. Os nenos acoden a formarse á aula? Dende a apertura no 2012 temos 1.745 usuarios dos cales un 13% son menores de 15 anos e un 12% teñen entre 16 e 25 anos. Aínda que a maioría das persoas que acuden as instalacións teñen entre 41 e 65 anos (42%), seguido dos maiores de 65 anos (17%) e de 26 a 40 (15%). Que outras propostas tendes? Ofertaremos este mesmo curso para adultos de 30 a 55 anos, creemos que hai interese por afondar nestes coñecementos básicos en aqueles que non son nativos dixitais. Tamén empezamos un obradoiro de follas de cálculo e outro de iniciación aos ordenadores.