Cidade da Cultura: Unha viaxe ao universo de Nós

A mostra máis completa e ambiciosa sobre a Xeración Nós, “unha das citas culturais imprescindibles deste outono”, “un recoñecemento ao legado dos pais do galeguismo contemporáneo”. Son algún dos cualificativos recibidos por Galicia, de Nós a nós , unha exposición que reúne na Cidade da Cultura de Galicia máis de 300 pezas no centenario da publicación dunha revista que é referente imprescindible da cultura galega do século XX. Promovida pola Xunta de Galicia e a Deputación de Ourense, despois da súa estancia na capital galega a mostra poderá verse no Centro Cultural Marcos Valcárcel da cidade das Burgas entre o 18 de febreiro e o 4 de abril de 2021. Exhibe obras procedentes de Francia, Alemaña e Portugal que poñen o foco nas conexións internacionais da revista Nós e dos seus impulsores, abrindo unha vía para subliñar a dimensión de universalidade e apertura da cultura galega. Tamén para destacar o legado do grupo de intelectuais galeguistas que contribuíron decididamente á renovación e dignificación da lingua e da cultura galega. Comisariada por Afonso Vázquez-Monxardín e Ana Acuña, Galicia, de Nós a nós, a segunda gran exposición do Xacobeo 2021, eríxese ademais como un proxecto de país co que o Goberno galego contribúe a dar a coñecer a riqueza dos fondos atesourados por numerosas fundacións e entidades da comunidade. Ourense no centro do relato Entre as máis de 60 institucións e prestadores privados que colaboran cos seus fondos nesta exposición imprescindible, atopamos unha ampla representación da provincia de Ourense. Seleccionamos entre elas apenas catro que non podes deixar de admirar na túa visita. Tecnoloxías interactivas adaptadas á era covid "Galicia, de Nós a nós" adáptase á situación xerada pola pandemia da covid-19 e, para minimizar calquera risco de contaxio, todos os elementos interactivos da exposición empregan tecnoloxías sen contacto físico, a través de sensores de presenza e movemento. Recrear a través de realidade aumentada o campamento romano de Aquis Querquennis, mergullarse nos temas, autores e conexións internacionais da revista, experimentar coa iconografía de Nós deseñada por Castelao ou viaxar ás cidades galegas do século XIX a través da cartografía da época son algunhas das experiencias que as persoas visitantes poden experimentar en sala grazas ao traballo asinado pola startup galega Xoia Software Development. Completan o percorrido expositivo un coidado traballo gráfico, asinado polo infografista e ilustrador Álvaro Valiño --colaborador de publicacións como National Geographic, The Washington Post, The Guardian, Corriere della Sera ou Science.