O conselleiro asegura estar á espera dunha resposta da UE sobre a arbitraxe
O conselleiro de Economía e Industria, Javier Guerra, considerou este luns que 'todo o que sexa que o sistema financeiro español poida ter saúde e viabilidade futura é bo', en alusión ao rescate da banca española, ao tempo que indicou que esta cuestión tamén podería ser 'positiva' para os afectados polas participacións preferentes.
En declaracións aos medios en Vigo, nas que foi preguntado sobre se os fondos desa liña de crédito poderían achegar unha mellor perspectiva de solución para os afectados sobre as preferentes, Guerra precisou que 'depende como se capitalicen os bancos'. No caso de Novagalicia Banco, recordou que se trata dun banco nacionalizado e que iso 'limita as posibilidades de solución'.
Guerra, que considerou que 'en principio é unha boa noticia' para os afectados, tamén afirmou que a Xunta seguirá insistindo nas súas actuacións na materia. Así, aludiu á colaboración coa Fiscalía -que traballa nunha demanda colectiva-, e á súa aposta pola 'arbitraxe' como solución 'a curto prazo', explicando que se atopa á espera dunha resposta da UE.
O conselleiro indicou que é 'obvio' que, se coa recapitalización, Novagalicia Banco pasa a ser unha entidade 'privada', a cuestión dos fondos para a axuda europea á banca 'podería ser unha solución'.
Non obstante, matizou que, se finalmente queda unha entidade 'pública', será 'Bruxelas' a que teña 'moito que dicir'. Finalmente, recordou as 'xestións' realizadas ante a UE.
