A Policía solicitou a colaboración dos veciños de Lugo para identificar un cadáver que apareceu nas inmediacións do río Miño, ao seu paso por esta cidade, porque as investigacións realizadas aínda non permitiron verificar a identidade do falecido.
Segundo informou a propia comisaría nun comunicado, o corpo, achado no pasado día 14 de marzo, pertence a un home de entre 40 e 55 anos, de 173 centímetros de estatura, pel branca, complexión normal, cabelo curto e crecho, ollos castaños, beizos finos e barba de poucos días.
As investigacións realizadas pola Policía permitiron determinar que esta persoa foi vista en varias ocasións nun estabelecemento de hostalaría da localidade de Oviedo e 'tamén cabe a posibilidade de que se movese polas zonas de Vigo e Pontevedra', di a nota policial.
