O termo de Albarellos de Monterrei estreará entre finais de ano e principios do vindeiro unha nova senda peonil que transcorrerá pola Vía da Prata e que mellorará a comunicación a pé neste entorno da comarca de Monterrei.
A actuación, que será sufragada pola Consellería de Infraestruturas e Mobilidade da Xunta de Galicia, acaba de ser adxudicada á empresa Misturas Obras e Proxectos Sociedade Anónima por un importe de case 150.000 euros.
Os traballos, xa anunciados dende a Administración autonómica galega, comezarán durante o vindeiro mes de agosto e terán un prazo de execución de seis meses, polo que se espera poder estrear a nova senda entre o mes de decembro e principios de xaneiro. Por outro lado, e tal e como informaron dende a Consellería de Infraestruturas, o itinerario previsto no proxecto desenvolverase na estrada autonómica OU-143. Neste senso, o trazado coincide no seu percorrido co discorrer da Vía da Prata, máis concretamente, no tramo comprendido entre os puntos quilométricos 1,460 e 1,800.
Agárdase que a nova senda facilite os desprazamentos cotiás dos veciños desta contorna dun xeito máis sustentable, cómodo e seguro.