Como xa é habitual nos últimos anos, a comunidade de montes veciñais en man común de Campobecerros (Castrelo do Val) organiza a quinta edición da camiñada pola ruta das “Portas do Invernadeiro”. A cita será este domingo, ás 08,30 horas dende a aldea de Campobecerros e ofrece unha andaina polos camiños deste núcleo rural con gran riqueza natural as portas do parque natural.
Haberá tres posibles percorridos circulares, adaptados ás necesidades dos participantes: un de dificultade baixa de 4,5 quilómetros, outro de dificultade media de 13,4 e un percorrido difícil de 18,9 quilómetros de distancia. Todas as rutas contarán con avituallamento de comida e auga fresca, ademais dun agasallo para todos os participantes nas “Portas do Invernadeiro”.
O equipo organizador tamén dispón dun coche escoba por se fora necesario recoller a algún participante, de duchas gratuítas e de servizo de bar, para cubrir, así, todas as necesidades dos camiñantes.
Dende a organización informan de que para participar é necesario inscribirse antes de que remate o día do 2 de xuño. O prezo da camiñada é de 5 euros, mentres que con comida é de 10 euros, co xantar no restaurante Merendeiro do núcleo rural. Os interesados poderán sumarse a esta andaina anotándose na tenda Multisport en Verín, no restaurante Merendeiro ou a través dos teléfonos 674 400 046 e 676 149 038.