A Insua dos Poetas, na Esgueva do Carballiño, será escenario este próximo 24 de xullo dunha representación teatral a cargo dun grupo de actores profesionais e dirixidos por Rosa Puga Dávila, sobre o camiño que realizaron a pé sete membros da Xeración Nós dende Ourense a Santiago de Compostela. Será ás 12,00 horas para celebrar o 95 aniversario da peregrinaxe que fixeron Vicente Risco, Ramón Otero Pedrayo, Florentino López Cuevillas, Xavier Pardo, Alfonso Vázquez Monxardín, Lois Feixóo e Antón Sánchez.
A idea xurdiu do presidente da Fundación Insua dos Poetas, Luis González Tosar, en colaboración coa actriz e directora teatral Rosa Puga, a partir das crónicas da viaxe que publicou Xavier Pardo en A Nosa Terra, entre o 25 de xullo de 1926 e o 1 de abril de 1927.
A representación céntrase na estancia dos peregrinos no Carballiño despois de recorrer a primeira etapa do camiño, escenificando as súas aventuras e o aloxamento no Hotel Carlos.
Luís González Tosar refírese precisamente a que reciben a visita da garda civil, montada a cabalo, que os identifica ante o insólito que era ver a un grupo de homes con cámaras e outros aparellos, e tendo en conta que os feitos sucederon en plena ditadura de Primo de Rivera. Tamén se cruzarán con arrieiros, que transportan os pelexos nas mulas en dirección a Santiago, mentres eles van recopilando datos sobre os elementos patrimoniais que atopan no Camiño Real da Idade Media, e seguindo a cartografía de Domingo Fontán que data de 1845.
Esta recreación teatral ten a particularidade de ser representada nun lugar polo que pasaron os camiñantes ó comezo da segunda etapa, moi preto da Ponte do Eixán límite entre os concellos do Carballiño e do Irixo.
Unha asociación de concellos reclama o recoñecemento cultural da ruta
“É un esforzo importante que se fai para poñer en valor este camiño”, sinala Luís González Tosar. O escritor lembra que se creou recentemente a Asociación de Concellos do Camiño de Nós, que preside o alcalde de O Irixo, Manuel Cerdeira, e da que forma parte a Deputación de Ourense, ademáis dos municipios por onde pasaron os peregrinos: Ourense, Amoeiro, Maside, Carballiño, O Irixo, Lalín, Silleda, A Estrada, Vedra, Boqueixón e Santiago de Compostela. En total, foron 105 quilómetros seguindo o Camiño Real polas provincias de Ourense, Pontevedra e A Coruña. O obxectivo da entidade é que a Xunta de Galicia declare oficialmente esta ruta como itinerario cultural.
A entrada a esta representación é libre e os interesados en participar no xantar que haberá ao rematar teñen ó seu dispor os tickets no Café Restaurante Rei de Copas e no Concello do Irixo
As crónicas da viaxe, acompañadas doutras testemuñas documentais e de fotografías, reuníronse no libro titulado “O Camiño de Nós”, editado por Luís González Tosar en 2020 e patrocinado pola Deputación de Ourense.
