O CEIP Nosa Señora de Xuvencos, en Boborás, contará cun patio de recreo cuberto no próximo curso. A Xunta de Galicia vén de licitar a contratación da obra de cubrición deste espazo por un importe de 142.906 euros. A actuación enmárcase no Plan de Nova Arquitectura Pedagóxica, a folla de ruta do Goberno galego para o deseño dos centros educativos do século XXI e para a adaptación dos existentes ás novas necesidades do ensino.
O proxecto propón a ampliación da superficie do edificio principal mediante a implantación de dúas novas cubertas situadas na parte posterior da edificación existente. Deste xeito, crearase espazo protexido da choiva, aberto polos seus laterais, que permitirá o desenvolvemento de actividades ao aire libre dos alumnos.
A estrutura da cuberta sustentarase sobre zapatas illadas de formigón armado, unidas entre si mediante vigas de cimentación, separadas da edificación lindeira. A estrutura será porticada de aceiro laminado, sobre a que se apoiarán paneis de dobre chapa de aceiro conxugados con paneis translúcidos de policarbonato. Tamén se colocarán canalóns de aceiro galvanizado para a recollida de augas pluviais e mudarase o pavimento por un novo de formigón armado.
O prazo estimado de execución dos traballos é de catro meses, unha vez que se adxudique e formalice a execución do proxecto.
