Un elenco de 12 persoas ofrece na noite do venres unha nova experiencia con aforo reducido
Unha casa ao pé da ponte de Toscaña, no Carballiño, será o marco no que se desenvolva a primeira produción escénica do novo grupo de teatro Dar Trela, que se estrenará o próximo venres, 5 de xuño, cun aforo limitado a 20 persoas, e para o que é preciso realizar a correspondente reserva só por vía telefónica. Esta experiencia teatral, insólita e pioneira na provincia de Ourense e Galicia, foi presentada onte por tres integrantes do colectivo, Clara Vázquez,Darío Rodríguez e Javier Nóvoa, acompañados polo concelleiro de Cultura, Diego Fernández.
A montaxe, nomeada "Cas Rohelia" non é unha obra de teatro ao uso, senón diversos xeitos de expresión (poesía conceptual, monicreques, teatro do absurdo, monólogos, microrrelatos e teatro negro) que se suceden en diversos lugares da vivenda, como son o exterior, a cociña, o corredor, o salón e o fallado. E, como remate, un coloquio entre os espectadores e os intérpretes. Clara Vázquez foi a encargada de explicar o contido do espectáculo."Fóra da casa haberá unha sesión inicial de poesía conceptual e monicreques, e xa no interior, na cociña, unha mostra de teatro do absurdo. No corredor, un monólogo interior e, no salón, microrrelatos con temática de realismo social, mentres no fallado, unha representación de teatro negro no que a temática será o medio ambiente", apuntou a directiva de Dar Trela.
Non é unha comedia, senón unha nova experiencia, ou, como indicou Darío Rodríguez, "unha nova forma de expresión e de interacción entre o espectador e os protagonistas". Un total de 12 actores e actrices interpretan os diferentes roles desta proposta teatral, nun espectáculo que está previsto para as 22,30 horas do vindeiro venres, cunha duración aproximada dunha hora e media, contando cos desprazamentos polos diversos escenarios da vivenda. Ademais desta sesión inaugural, tamén terán lugar outras representacións o sábado e o domingo, 6 e 7 de xullo, á mesma hora.
O prezo da entrada é de 7 euros, e non se poderá adquirir en taquilla, senón de xeito anticipado a través de whatsapp ou chamando aos teléfonos 645167278 ou 600829089. O concelleiro de Cultura,Diego Fernández, agradeceu o esforzo que realiza este grupo, "que é novo pero que conta cunha gran experiencia teatral, por crear algo diferente e novidoso", á vez que lles desexou moito éxito e parabéns.
Javier Nóvoa agradeceu a Chechu Carballido a composición da música do espectáculo, que é orixinal, así como a Chus Otero a elaboración do cartel anunciador e ao Concello do Carballiño por ceder o auditorio para os ensaios.
