A Concellería de Educación do Concello de Ourense organiza un ciclo de obradoiros nos que escolares da cidade aprenderán a elaborar os bonecos cos que participarán na próxima celebración dos Xoves de Compadres e Comadres.
Con esta actividade, incluida no programa educativo Días con Nome Propio, o Concello pretende fomentar o desfrute destas tradicionais celebracións do ciclo do Entroido ourensán, que terán lugar os días 20 de febreiro (Xoves de Compadres) e 27 de febreiro (Xoves de Comadres), de 11:30 a 12:20 horas, na Praza Maior, ás que asistirán alumnas e alumnos de Educación Primaria da nosa cidade.
Os obradoiros, impartidos por monitoras especializadas, comezarán mañá, xoves, día 13 de febreiro, no CPR A Purísima (de 9.30h a 11.00h) e no CEIP Inmaculada, de 11.15h a 14.00h, continuando en diferentes centros educativos ata o día 26 de febreiro.
Participarán na actividade un total de 350 alumnos e alumnas de todos os cursos de Educación Primaria de 9 centros de ensino da cidade: Irmáns Villar, Inmaculada, Amadeo R. Barroso, Manuel Sueiro, José G. García (Mende), Maristas, A Purísima e Divina Pastora e Miño.
